Андижон вилоятида 2022 йилнинг ўтган даври мобайнида 125 та йўл-транспорт ҳодисаси содир этилган бўлиб, оқибатда 23 нафар фуқаро вафот этган. Бу ҳақда вилоят ЙҲХБ томонидан ўтказилган матбуот анжуманида маълум қилинди дея хабар бермоқда «Дарё» мухбири Умиджон Мамарасулов.
Матбуот анжуманида маълум қилинишича, Андижон вилоятида 2021 йилда содир бўлган 848 та йўл-транспорт ҳодисаси оқибатида 163 киши вафот этган, 685 нафар фуқаро эса турли даражада тан жароҳати олган.
Вилоят йўл ҳаракати хавфсизлиги бошқармаси бошлиғи ўринбосари Дониёр Турғуновнинг маълум қилишича, 2021 йилда йўл-транспорт ҳодисалари ва уларнинг оқибатида жабрланганлар сони 2020 йилга нисбатан ошган. 2021 йилда 848 та йўл-транспорт ҳодисаси содир этилган бўлиб, оқибатда 163 киши вафот этган, шунингдек, 685 нафар фуқаро турли хил оғир тан жароҳати олиб, шифохонага ётқизилган. Натижада ЙТҲлар 26 фоизга, вафот этганлар 22,5 фоизга, турли тан жароҳатлари олганлар эса 26,8 фоизга ортган. Содир этилган ҳодисаларнинг катта қисми вилоят маркази, шунингдек Андижон, Шаҳрихон ҳамда Олтинкўл туманларига тўғри келади.«Мисол учун, Андижон шаҳрида ўтган йили жами 195 та йўл-транспорт ҳодисаси содир этилган бўлиб, 16 киши вафот этган, 179 киши турли даражадаги тан жароҳати олган. Рақамлар қиёсланганда вилоят бўйича содир этилган жами йўл-транспорт ҳодисаларининг 21,1 фоизини ташкил этган», — дейди Дониёр Турғунов.
Қайд этилишича, 2022 йилнинг биринчи чораги давомида вилоят бўйлаб 125 та ЙТҲ содир этилган бўлиб, оқибатда 23 нафар фуқаро вафот этган, 102 киши эса турли тан жароҳатлари олган. Энг кўп ЙТҲ Андижон шаҳри (21), Асака ва Андижон туманларида юз берган.
«Транспорт воситаларининг кўплиги, йўлларнинг тирбандлиги жиҳатдан Андижон шаҳри республикамизда энг юқори ўринда турадиган ҳудудлардан бири саналади. Шу сабабли ушбу ҳудудда транспорт ва пиёдалар ҳаракатини тартибга солиш олдимизда турган энг асосий масалалардан бири бўлиб турибди. Келгусида вужудга келиши мумкин бўлган муаммоларни олдини олиш мақсадида мутасадди идоралар билан биргаликда ‘2022—2023 йилларда Андижон шаҳрида йўл ҳаракати хавфсизлигини таъминлаш концепцияси’ ишлаб чиқилди. Унга асосан икки йил давомида 30 та чорраҳага инновацион камера ва фоторадарлар ўрнатиш, ўта юқори тирбандликлар кузатилаётган 13 та чорраҳани тартибга солиш мақсадида транспорт воситалари, пиёдалар учун қўшимча йўллар, шунингдек, велосипед йўлакчалари ташкил этиш белгиланган», — дейди масъул.
Изоҳ (0)