Шавкат Мирзиёев 15 апрель куни ўтказилган видеоселектор йиғилишида экспортчи корхоналарни қўллаб-қувватлаш чоралари кучайтирилишини айтди. Бу ҳақда президент матбуот котиби хабар қилди.
Қайд этилишича, ўтказилган учрашувларда ҚҚСни қайтаришда муаммолар борлиги аниқланган. Шу муносабат билан уларга ҚҚСни қайтариш бўйича соддалаштирилган механизм жорий этилиб, 80 фоиз маблағ қўшимча текширувларсиз 7 кун ичида қайтариб берилади.
Бундан ташқари, экспортчиларнинг масалаларини доимий ўрганиб, уларни тезкорлик билан ҳал қилиш бўйича узлуксиз ва доимий ишловчи штаб тузилади, 1094 рақамли Call-марказ ташкил этилади.
Президент ер участкаларини аукционга чиқариш муаммосига тўхталган. 35 мингта ер участкаси электрон тизимга киритилгани билан, бугунги кунга қадар Навоий, Сирдарё, Тошкент вилоятлари ва Тошкент шаҳрида бирорта ер участкаси аукционга чиқарилмагани кўрсатиб ўтилган.
Ҳокимликлар, қурилиш ва архитектура идоралари масалага юзаки қараётгани таъкидланган. «Неча марта бу масала сизларга тушунтирилди. Тадбиркорлардан талаб катта, лекин амалда ҳали натижа йўқ», — дея танқид қилган давлат раҳбари.
Изоҳ (0)