Тошкент вилояти ҳокимлиги президент Шавкат Мирзиёевнинг ҳокимларга йил якунига қадар автомобиль, мебель ва офис анжомлари харид қилишни тақиқлаш тўғрисидаги топшириғига қарамай 1 миллиард 196 миллион сўмга 10 та зотдор от ва 453 миллион сўмга мебель харид қилди. Бу ҳақда давлат харидлари порталида қайд этилган.
«Дарё» мухбири мазкур ҳолатга изоҳ олиш мақсадида вилоят ҳокимлиги ахборот хизмати масъули билан суҳбатлашди.
«Зотдор отларнинг харид қилиниши вилоятда ташкил этилган Чавандозлар мактаби фаолияти билан боғлиқ бўлиб, 1 миллиард 196 миллион сўмга харид қилинган зотдор отларнинг барчаси шу мактабга берилган», — деди ҳокимлик ахборот хизмати раҳбари вазифасини вақтинча бажарувчи масъул.
Вилоят ҳокимлиги ахборот хизматининг «Дарё»га берган маълумотига кўра, онлайн савдо орқали «Ўзбегим отлари» МЧЖдан ҳар бири 119 миллион 600 минг сўмга сотиб олинган отлар Агентхон, Меликхон, Муносибхон, Рашмор, Маор, Капрал, Карнавал, Оламхон, Ятаганбек, Айдемирхон лақабли отлар бўлиб, ахалтеки ва инглиз тоза қонли отлари ҳисобланади.
«Бу отлар президентнинг 2021 йил 5 августдаги ‘Чавандозлар мактаблари фаолиятини ташкил этиш чора-тадбирлари тўғрисида’ги қарори ижросини таъминлаш мақсадида харид қилинган бўлиб, бу ҳақда давлат харидлари порталида ҳам аниқ маълумотлар берилган», — дейди ҳокимлик ахборот хизмати масъули.
Ҳокимлик масъули 453 миллион сўмга мебель харид қилинишига ҳам тўхталиб, барча мебеллар ҳокимлик биноси олдида янги қурилган видеоанжуманлар, ишчи йиғилишлар ўтказишга мўлжалланган зал учун сотиб олинганини айтмоқда.
«Тошкент вилояти ҳокимлигининг ўз биноси йўқ. Ҳокимлик Ўрта Чирчиқ тумани ҳокимлигининг эски биносидан фойдаланиб келади. Аслида вилоят ҳокимлик тузилмаси катта бўлгани учун айни пайтда фойдаланиб турилган бино олдидан қўшимча бинолар қурилиб, кенгайтирилмоқда. Барча мебеллар ҳокимлик биноси олдида янги қурилган видеоанжуманлар, ишчи йиғилишлар ўтказишга мўлжалланган зал учун сотиб олинган. Ҳеч қайси мебель фақат ҳоким учун сотиб олинмаган, буни нотўғри таҳлил қилиш керак эмас», — дейди Зоир Мирзаевнинг матбуот котиби вазифасини вақтинча бажариб турган масъул.
Изоҳ (0)