Тошкент вилоятида 1 сентябрга қадар юқори қувватли Маълумотларни сақлаш ва қайта ишлаш маркази ишга туширилади

Шавкат Мирзиёев 14 апрель куни ўтказилган IТ соҳасига доир йиғилишда телекоммуникация тармоғини кенгайтириш йўналишида ҳам қатор вазифаларни белгилаб берди. Бу ҳақда президент матбуот котиби хабар қилди.

Қайд этилишича, йил якунига қадар:

• 6 минг 800 та янги мобил станцияни ўрнатиш ва 80 та олис қишлоқни алоқа тизимига улаш (яна 38 та қишлоқ 2023 йилда уланади);
• қўшимча 800 минг хонадонни юқори тезликдаги интернетга улаш;
• республика бўйича оптик толали алоқа қамровини 80 фоизга етказиш;
• 60 фоиз магистрал йўлларни мобил интернет билан таъминлаш топширилган.

Шунингдек:

• биринчи ярим йилликда 100 миллион, йил якунигача 300 миллион доллар инвестицияни ўзлаштириш;
• икки ой муддатда Абу-Даби фонди билан «Ўзбекистон почтаси»ни трансформация қилиш режасини ишлаб чиқиб, киритиш вазифаси қўйилди.