Шавкат Мирзиёев раислигида 8 апрель куни Саховат, Мурувват ва Меҳрибонлик уйлари ҳамда махсус мактаб интернатлари фаолияти бўйича видеоселектор йиғилиши бўлиб ўтди, деб хабар берди «Дарё» мухбири.
Президент видеоселектор давомида Тошкент вилояти ҳокими Зоир Мирзаев билан ҳам суҳбатда бўлди. Шавкат Мирзиёев ҳокимга зарур топшириқларни берди. Давлат раҳбари мулоқот давомида Зоир Мирзаевдан ўзи Мурувват уйига бормаганида ҳоким қачон боришини сўради.
«Ҳар бир учрашувда бизнинг кўзимизни очасиз. Агар сиз Мурувват уйига бормаганингизда, биз қоғозга ишониб, ҳаммаси яхши, деб юраверар эдик», — деди Тошкент вилояти ҳокими.
Зоир Мирзаев президентга вилоятдаги тиббиёт ходимлари учун иш жойида бепул тушлик ва кечки овқатни ташкил этиш бўйича таклиф берди. Давлат раҳбари мазкур таклифни маъқуллади.
Шунингдек, ҳоким президентга ногиронлиги бор шахсларнинг илтимосини етказди.
«Агар Мурувват уйига ногиронлар келадиган бўлса, шу кундан бошлаб уларнинг махсус нафақалари тўхтар экан. Улар ҳеч бўлмаса, 10 фоизини берса эди, дейишяпти», — деди ҳоким.
Шавкат Мирзиёев бу молия тизимининг эски ғоялари билан қолиб кетган қоида эканлигини айтди.
«Албатта, кўриб чиқиб, адолатли қарор қилинади. Ахир улар ногирон бўлса-ю, яна уларнинг қадрини жойига қўймасак, тўғри бўлмайди», — деди президент.
Изоҳ (0)