Ижтимоий тармоқларда «Пахтакор» стадионида футбол тугаганидан сўнг жанжал юзага келгани ва мухлислар калтаклангани айтилган видео тарқалди. Тошкент шаҳар ИИББ ҳолатга муносабат билдириб, ҳозирда текширув ҳаракатлари олиб борилаётганини маълум қилди.
Видеода айтилишича, «Навбаҳор» мухлисининг 2 та тиши синган, тан жароҳатлар олган ва тез ёрдамга мурожаат қилган.Тез ёрдам ходими ҳам беморни «Пахтакор» стадиони ёнидан олганини тасдиқлаган.
Маълум қилинишича, 1 апрель куни соат 19:00 да пойтахтнинг «Пахтакор» стадионида Ўзбекистон чемпионати мусобақаси доирасида Тошкентнинг «Пахтакор» ва Наманган вилоятининг «Навбаҳор» жамоалари ўртасида футбол учрашуви бўлиб ўтган.
Учрашув якунланганидан сўнг «Навбаҳор» ва «Пахтакор» жамоалари футболчилари ўртасида ўзаро келишмовчилик келиб чиққан. Ушбу келишмовчилик, хизматга жалб қилинган ҳуқуқни муҳофаза қилувчи орган ходимлари томонидан зудлик билан бартараф этилиб, оммавий тартиббузарликларнинг олди олинган.
Ҳозирда ҳолат юзасидан Шайхонтоҳур тумани ИИО ФМБ томонидан текширув ўтказилмоқда.
Эслатиб ўтамиз, «Нефтчи»—«Турон» учрашуви тугаганидан кейин «Нефтчи» футболчилари ва мухлислар ҳакамларга ташланганди. Вазиятларнинг бирида фарғоналиклар ўйинчиси учрашув бош ҳаками Шавкат Насибуллаевга оёқ билан зарба берган. Кейинчалик ҳакамга зарба берган футболчи 98-рақамли Жамшид Тўрақулов экани маълум бўлганди.
Шундан сўнг ўйиндан кейин юзага келган тартибсизликларда иштирок этган беш нафар шахсга нисбатан 15 сутка маъмурий қамоқ жазоси тайинлангани ва олти кишига нисбатан жиноят иши очилгани, улар орасида икки нафар «Нефтчи» футболчилари ҳам борлиги ҳақида хабар берилганди. 2021 йилнинг февралида жиноят ишлари бўйича Фарғона шаҳар судида «Нефтчи»—«Турон» футбол ўйинида келиб чиққан жанжал бўйича жиноят иши очиқ суд мажлисида кўриб тамомланганди.
Изоҳ (0)