2021 йилнинг августида Тошкент вилояти Оққўрғон туманидаги боғчада 25 нафар бола заҳарлангани тўғрисида хабар берилганди. Бош прокуратура матбуот хизматининг «Дарё» сўровига кўра маълум қилишича, ҳолат бўйича 6 нафар шахсга айблов эълон қилинган.
Тошкент вилояти ИИБ ҳузуридаги Тергов бошқармаси томонидан Оққўрғон туманидаги 5-сонли МТТ тарбияланувчилари заҳарланиши билан боғлиқ жиноят иши (санитарияга оид қонунчиликни ёки эпидемияга қарши кураш қоидаларини бузиш) бўйича тергов ҳаракаталари олиб борилмоқда.
Ҳозирда жиноят иши бўйича 6 нафар шахсга нисбатан Жиноят кодексининг 116 (касб юзасидан ўз вазифаларини лозим даражада бажармаслик), 207 (мансабга совуққонлик билан қараш), 257-1-моддалари айблов эълон қилиниб, уларга нисбатан тегишли эҳтиёт чоралари қўлланилган. Тергов ҳаракатлари давом этмоқда.
Эслатиб ўтамиз, Тошкент вилоятининг Оққўрғон туманидаги боғчада 12 август куни 25 нафар бола заҳарланиб, шифохонага ётқизилганди. 13 август куни тиббиёт муассасаларига ётқизилган тарбияланувчилар сони 30 нафарга етганди. Шу куни Оққўрғонда боғча боласи пневмониядан вафот этган, ижтимоий тармоқларда унинг ўлимига заҳарланиш сабаб бўлгани ҳақида хабарлар тарқалган эди. 23 август куни Мактабгача таълим вазирлиги ушбу болаларнинг 25 нафарига уйига жавоб берилганини маълум қилган.
Изоҳ (0)