30—31 март кунлари Хитойнинг Хуаншань шаҳрида Афғонистонга қўшни давлатларининг 3-вазирлар конференцияси бўлиб ўтди. Унда Россия, Хитой, Эрон, Покистон, Тожикистон, Туркманистон ва Ўзбекистон ҳукуматлари аъзолари ва ташқи ишлар вазирлари иштирок этди, деб хабар беради Инвестициялар ва ташқи савдо вазирлиги.
Конференция доирасида Афғонистонга қўшни давлатлар ташқи ишлар идоралари раҳбарларининг Афғонистон ташқи ишлар вазири вазифасини бажарувчи Амир Хон Муттақий бошчилигидаги Афғонистон муваққат ҳукумати делегацияси билан учрашуви бўлиб ўтган. Унда Индонезия ва Қатар ташқи ишлар вазирлари меҳмон сифатида қатнашган. Ушбу тадбирларда Ўзбекистон номидан бош вазир ўринбосари — инвестициялар ва ташқи савдо вазири Сардор Умурзоқов иштирок этган.
Конференцияда можародан кейинги даврда Афғонистондаги ижтимоий-иқтисодий вазиятни барқарорлаштириш мақсадида кўп томонлама ҳамкорлик масалалари муҳокама қилинган. Томонлар ички ва ташқи муаммоларни ҳал қилишда Афғонистонни қўллаб-қувватлашнинг энг самарали ёндашувлари юзасидан фикр алмашган. Шу билан бирга, мамлакат муваққат ҳукумати томонидан ушбу йўналишда амалга оширилаётган саъй-ҳаракатлар эътироф этилган.
Афғонистон инқирозини тинч йўл билан ҳал қилиш учун минтақа давлатларининг саъй-ҳаракатларини бирлаштириш, мамлакатда барча этник ва сиёсий гуруҳларнинг иштирокига асосланган инклюзив ҳукумат тузишни жадаллаштириш, шунингдек, инсон ҳамда аёллар ва миллий озчиликларнининг ҳуқуқларини таъминлаш муҳимлиги таъкидланган. Афғонистон муваққат ҳукумати томонидан мамлакатдаги террористик ташкилотлар фаолиятига йўл қўймаслик ҳамда Афғонистон ҳудудидан қўшни давлатларга таҳдидларнинг олдини олиш бўйича ўз мажбуриятлари бажарилишининг муҳимлигига, шунингдек, халқаро ҳамжамиятнинг бошқа талабларига алоҳида эътибор қаратилган.
«Конференцияда сўзга чиққан Сардор Умурзоқов Афғонистонга мавжуд муаммоларни бартараф қилиш, миллий иқтисодиётни қайта жонлантириш, ижтимоий масалаларни ҳал этиш ва мамлакат ҳаётини нормаллаштиришда кўмаклашишга қаратилган минтақавий ҳамкорликни мувофиқлаштиришни кучайтириш зарурлигини таъкидлади. Афғонистон муваққат ҳукуматини халқаро миқёсда тан олишнинг механизми ва мезонларини ишлаб чиқиш таклиф қилинди. Ушбу чоралар мамлакатнинг минтақавий макон ва халқаро ҳамжамиятга интеграциялашувини тезлаштириш имконини беради», — дейилади хабарда.
Анжуман якунида тарафларнинг қўшма баёноти ва Афғонистонни иқтисодий жиҳатдан тиклашни қўллаб-қувватлаш бўйича «Тунси ташаббуси» қабул қилинган.
Тадбирлар доирасида Сардор Умурзоқов хорижлик ҳамкасблари билан бир қатор икки томонлама учрашув ва музокаралар ҳам ўтказган. Хусусан, Хитой давлат кенгаши аъзоси, ташқи ишлар вазири Ван И, Россия ташқи ишлар вазири Сергей Лавров, Эрон ташқи ишлар вазири Ҳусайн Амир Абдуллаҳиён ва Афғонистон ташқи ишлар вазири вазифасини бажарувчи Амир Хон Муттақий билан икки томонлама ҳамкорлик масалалари муҳокама қилинган. Учрашувлар давомида томонлар олиб борилаётган саъй-ҳаракатларнинг ҳозирги ҳолатини муҳокама қилган ҳамда устувор йўналишларда икки томонлама ҳамкорликни чуқурлаштириш борасида навбатдаги тадбирларни белгилаб олган.
Изоҳ (0)