Фарғона вилояти ҳуқуқ-тартибот идоралари томонидан ҳудудларда ўтказилган профилактик тадбирлар давомида вояга етмаган болаларга ноқонуний равишда диний таълим бериб келган фуқаролар аниқланди, деб хабар беради ЎзА.
Хусусан, Ёзёвон туманида яшовчи фуқаро Х.Х. махсус диний маълумоти бўлмай туриб ва диний ташкилот бошқаруви марказий органининг рухсатисиз яшаш хонадонида ҳужра ташкил қилиб, 19 нафар вояга етмаган болага диний таълимот берган. Фуқаро Ж.Т. диний йиғилишлар ўтказиш тартибини бузиб, мазкур ҳужрада таълим олаётган болаларга имомлик қилиб келган.
Ҳолат юзасидан ушбу шахсларга нисбатан Маъмурий жавобгарлик тўғрисидаги кодексининг 241-моддасига (диний таълимотдан сабоқ бериш тартибини бузиш) мувофиқ ҳужжатлар расмийлаштирилиб, судга оширилган. Суд томонидан ҳуқуқбузарларга 10 сутка маъмурий қамоқ жазоси тайинланган.
Қонунчиликка кўра, агарда шахс маъмурий жавобгарликка тортилганидан сўнг яна шу каби ноқонуний фаолият билан шуғулланса, Жиноят кодексининг 229−2-моддасига асосан (диний таълимотдан сабоқ бериш тартибини бузиш) жиноий жавобгарликка тортилиши мумкин.
Аввалроқ Сурхондарёда уйида вояга етмаган болаларга диний сабоқ берган эркак жаримага тортилгани, Сурхондарёда уйида ноқонуний ҳужра ташкил қилган эркак ушлангани тўғрисида хабар берилганди.
Изоҳ (0)