Миллий Олимпия қўмитаси (МОҚ) қошида Атлетлар комиссияси ташкил этилди ва унинг таркиби шакллантирилди. Атлетлар комиссияси ўзбекистонлик спортчиларнинг халқаро майдондаги ҳуқуқ ва манфаатларини ҳимоя қилади.
Комиссияга таэквондочи Дмитрий Шокин раҳбар этиб тайинланди, гимнастикачи Оксана Чусовитина ва курашчи Бекзод Абдураҳмонов унга ўринбосар бўлди.
Атлетлар комиссияси аъзолари Халқаро Олимпия қўмитаси талаблари асосида тегишли спорт федерациялари томонидан тавсия этилган 12 нафар спортчи орасидан овоз бериш йўли билан саралаб олинган. Танловда гендер тенглик таъминланиши, спортчиларнинг сўнгги уч Олимпия ўйинларидан бирида иштирок этган бўлиши, қолаверса, таркибда ҳам ёзги, ҳам қишки Олимпия ўйинларида қатнашган номзодлар бўлиши талаб этилади.
Аноним тарзда ўтган овоз жараёни якунида қуйидаги спортчилар Атлетлар комиссияси таркибига аъзо бўлди: Оксана Чусовитина (спорт гимнастикаси), Ришод Собиров (дзюдо), Дмитрий Шокин (таэквондо), Бекзод Абдураҳмонов (эркин кураш), Зайнаб Дайибекова (қиличбозлик), Светлана Радзивил (енгил атлетика) ва Комилжон Тўхтаев (тоғ чанғиси).
Таркиб аниқлаб олингач, комиссия аъзолари дастлабки йиғилишини ўтказган ва ўзаро келишган ҳолда раҳбарият таркиби шакллантирилган.
Ушбу комиссия аъзолари МОҚ Бош ассамблеяси ва Ижроқўми таркибига киритилади. Улар муҳим жараёнларда ўз фикрини билдириш, сайловларда овоз бериш ҳуқуқига эга бўлади. МОҚ Ижроқўмига Зайнаб Дайибекова, Бош ассамблеяга эса Светлана Радзивил ва Комилжон Тўхтаев номзоди тақдим этилган.
Изоҳ (0)