Ўзбекистон бўйлаб ҳар 100 км масофага электр зарядлаш станциялари ўрнатилади

Megawatt Motors ҳамда Экология ва атроф-муҳитни муҳофаза қилиш давлат қўмитаси Ўзбекистонда яшил транспортни ривожлантириш бўйича ҳамкорлик меморандумини имзолади. Бу ҳақда қўмита матбуот хизмати хабар берди.

Megawatt Motors’нинг маълум қилишича, имзоланган ҳужжатга кўра, 2022−2023 йилларда Тошкент шаҳрининг барча туманлари ва вилоятлар марказларида электромобилларни «тезкор» қувватлантириш шохобчалари ўрнатилади. Режа ҳар икки томон томонидан ҳам ДХШ асосида амалга оширилади.

Бундан ташқари, Экология қўмитаси давлат органларидан биринчилардан бўлиб ўз автопаркида электромобилларга босқичма-босқич ўтишни бошлади. Megawatt Motors бошқа ташкилотлар ҳам шунга ўхшашидан умид қилади.

Spot’нинг Megawatt Motors вакилига таяниб ёзишича, компания ҳозирда 10 та зарядлаш станциясидан иборат тармоқ яратишнинг биринчи босқичини якунлаган. Иккинчи босқичда уларга яна 68 та нуқта қўшилади, шундан 56 таси 60 кВт қувватга, 12 таси эса 100 кВт қувватга эга.

Станциялар бутун Ўзбекистон бўйлаб ўрнатилади. Megawatt Motors электр ёнилғи қуйиш шохобчалари «ҳар 100 километрда бўлади», деб ваъда қилмоқда компания. Тахминий харажат 500 минг долларни ташкил этади, компания ҳаммасини ўз маблағлари ҳисобидан тўлайди.

Ҳозирда Ўзбекистон учун Plugshare харитасида 42 та электр станцияси кўрсатилган. Улардан 22 таси пойтахтда, 4 таси Тошкент вилоятида жойлашган. Самарқанд, Қарши, Наманган, Қўқон, Фарғона ва Навоий вилоятида ҳам станциялар мавжуд.

Эслатиб ўтамиз, Шавкат Мирзиёев 14 февраль куни машинасозлик саноатига бағишланган йиғилишда электромобиллар ишлаб чиқариш тармоғига ҳам тўхталиб ўтганди. «Жаҳонда электромобиллар ишлаб чиқариш жадал ривожланиб, автомобиль бозорида салмоқли ўрин эгалламоқда. Биз ҳам бу соҳада ортда қолмаслигимиз учун амалий ишларни ҳозирдан бошлашимиз керак», — деган эди президент йиғилишда. Ўшанда мутасаддиларга уч ой муддатда электромобиль тармоғини ривожлантириш стратегиясини киритиш топширилган эди.