Тошкентда банкрот бўлган компаниянинг 6 қаватли биноси 40 млрд сўмга аукционга қўйилди

Тошкентда олти қаватли бино аукционга қўйилди. Лот «Офис, савдо ва маиший хизмат мажмуаси» деб белгиланди.

Бино 2008 йилда қурилган ва 2015 йилда реконструкция қилинган. Унинг умумий майдони – 1683 квадрат метр. Фойдали майдони – 1317 квадрат метр. Газ, электр таъминоти, сув ва канализация бор.

Кадастр ҳужжатига асосан, ер майдони ижара ҳуқуқи асосида берилган. Бинонинг 877,0 квадрат метрли ертўла ва 1—2-қаватларидан иборат қисми сотилган. Бино ажралмас лифт, видео кузатув, совитиш ва иситиш ускуналари, ёнғинга қарши тизим, иссиқ пол, ёрдамчи чиқиш жойи билан жиҳозланган, корхонада электр энергия ТП ва дизель генератори мавжуд.

Лот банкрот деб топилган Train Concultancy МЧЖ кредиторларининг йигилиш қарорига асосан сотувга чиқарилган.

Бошланғич нарх – 40 млрд сўм. Аризалар 19 апрелгача қабул қилинади. Савдо шу куни бўлиб ўтади. 

Аввалроқ аукционга қўйилган «Анҳор» боғи биринчи уринишда сотилмагани ҳақида хабар берилган эди.