Ўзбекистонда Cobalt ва Lacetti етишмовчилиги — ишлаб чиқариш ўсмоқда, аммо навбатлар ундан-да тез ўсмоқда

Йил бошидан бери Ўзбекистонда Cobalt ва Lacetti энг кўп ишлаб чиқарилган автомобиллар бўлди. Бу Давлат статистика қўмитасининг ҳисоботида қайд этилди.

Хусусан, икки ой ичида UzAuto Motors 10 787 та Cobalt ва 12 340 та Lacetti чиқарган.

Бироқ айнан мана шу иккала моделга энг кўп навбатлар юзага келмоқда. Бу Uzavtosavdo иловасида қайд этилган.

Cobalt учун ҳозир деярли 15 минг киши навбатда турибди —автомобилни тахминан июль ойининг охирида олиш мумкин бўлади. Lacetti учун эса ҳозирда 1333 та одам навбатга ёзилган — автомобилни тахминан август ойи охирида олиш мумкин.

Ҳамёнбоп моделлар орасида Nexia модели энг яхши таклиф бўлиб турибди – йил бошидан бери шу моделдаги 2902 дона автомобиль ишлаб чиқарилган бўлишига қарамай, улар сотувда бор, навбатлар эса нисбатан камроқ. Автомобильни ҳозирнинг ўзида сотиб олинса, уни тахминан 7 кундан сўнг олиш мумкин бўлади.

Аввалроқ UzAuto Motors олдиндан тўлов миқдорини 85 фоиздан 50 фоизга туширгани ҳақида хабар берилган эди.