Лионель Месси «Барселона»га қайтиши мумкин, унинг отаси каталон клуби раҳбарияти билан суҳбатлашган

«ПСЖ» ҳужумчиси Лионель Месси Париждаги ҳолатидан норози ва у «Барселона»га қайтиши мумкин.

Аргентиналик футболчининг отаси Хорхе Месси бир неча кун олдин каталонияликлар раҳбарияти билан алоқага чиққан. Журналист Адриэн Греньенинг хабар қилишича, суҳбатда Мессининг Испанияга қайтиш масаласи кўтарилган.

Лионель 2000 йилдан 2021 йилга қадар «кўк-анорранглилар» тизимида фаолият юритган. 2021 йилнинг ёзида эркин агент мақомида «ПСЖ» сафига бориб қўшилганди.

Парижликлар Чемпионлар Лигаси 1/8 финалида «Реал»га имкониятни бой бериб, мусобақани тарк этганди. Шундан сўнг 34 ёшли футболчи Парижни тарк этиши ҳақида хабарлар тарқалди. Аргентиналикни мавсум бошидан бери француз ОАВ тинмай танқид қилмоқда, «ПСЖ»нинг Лига 1 доирасидаги сўнгги ўйинида эса парижлик мухлислар Леони ҳақорат сўзлар билан «сийлаган».

Месси 2021/22 йилги мавсум Париж жамоаси сафида барча мусобақаларда 26 та ўйинда иштирок этиб, 7 та гол ва 11 та голли узатма муаллифига айланди.