Туркманистонда 12 март куни соат 07:00 муддатидан олдинги президентлик сайловларини ўтказиш учун 2577 та овоз бериш участкалари очилди, деб хабар беради Tengrinews. Овоз бериш жараёнлари соат 19:00 га қадар давом этади.
Туркманистоннинг хориждаги дипломатик ва консуллик муассасаларида очилган 41 та сайлов участкасида ҳам овоз бериш жараёнлари амалга ошириляпти. У ерда овоз бериш ўша давлатнинг маҳаллий вақти билан соат 19:00 га қадар давом этади.
Туркманистон президентлигига тўққиз киши ўз номзодини қўйган: амалдаги президентнинг ўғли, бош вазир ўринбосари Сердар Бердимуҳамедов, Мари вилояти ҳокимининг ўринбосари Агжан Бакмирадов, «Аваза» санаторийси бош шифокори Бердимаммет Гурбанов, туман санитария-эпидемология хизмати бошлиғи Максатмират Овезгелдиев, «Қайта тикланувчи энергия манбалари» илмий-тадқиқот маркази директори Какагелди Сариев, молия-иқтисод мактаби директори Перхат Беганжов, «Ишончли қурилиш» хўжалик жамияти директори Бабамират Мередов, Туркманистон давлат жисмоний тарбия ва спорт институтининг илмий ишлар бўйича проректори Хидир Нуннаев ва Демократлар партияси туман қўмитаси раиси Максат Одешов.
Туркманистон қонунчилигида сайловчиларнинг иштирок этиш чегараси белгиланмаган, шунинг учун сайловчиларнинг ҳар қандай фаоллигида ҳам сайлов ўтган деб топилади.
Туркманистон Сайлов кодексига кўра, Марказий сайлов комиссияси сайловдан кейин еттинчи кундан кечиктирмай овозларни умумлаштиради, баённома тузади ва натижаларини эълон қилади. Овоз беришда иштирок этган сайловчиларнинг ярмидан кўпининг овозини олган номзод президент сифатида эълон қилинади.
Туркманистон президенти этиб мамлакат ҳудудида туғилган, 40 ёшдан кичик бўлмаган, давлат тилини биладиган, 15 йил давомида Туркманистонда муқим яшаган ва ишлаган номзод сайланиши мумкин. Туркманистон президенти бевосита халқ томонидан етти йил муддатга сайланади ва қасамёд қабул қилган вақтидан лавозимга киришади. Янги президентнинг инаугурацияси 19 мартда бўлиб ўтади.
Эслатиб ўтамиз, 11 февраль куни Туркманистон парламенти олий палатасининг навбатдан ташқари йиғилишида мамлакатни 15 йилдан бери бошқариб келаётган Гурбангули Бердимуҳамедов раҳбарликни ёшларга топшириш ва фаолиятини Халқ маслаҳати раиси сифатида давом эттириш ниятини маълум қилди.
15 февраль куни Бердимуҳамедовнинг ўғли, иқтисодиёт бўйича бош вазир ўринбосари Сердар Бердимуҳамедов бўлажак сайловларда мамлакат президентлигига биринчи номзод сифатида кўрсатилди. Кейинроқ туркман мухолифатининг хориждаги вакиллари ҳам президентлик сайловларида қатнашиш истагини билдирганди. Улар онлайн овоз бериш усулини таклиф қилган.
Изоҳ (0)