Жорий йилнинг 9 март куни UzAuto Motors АЖ томонидан 2022—2023 йилларда компания акцияларининг маҳаллий ва хорижий фонд бозорларида бирламчи оммавий таклиф (IPO) орқали жойлаштирилишини ташкиллаштириш учун андеррайтерлар консорсиумини танлаб олиш бўйича расмий тендер эълон қилинди.
Потенциал инвесторларни аниқлаш, бозор шароитини ва IPO жараёнини ташкиллаштирувчи банк андеррайтерлар фикр-мулоҳазасини ўрганиш мақсадида, 2021 йил октябрь—ноябрь ойларида компания томонидан JP Morgan, Citi, Credit Suisse, Raiffeisen Bank International, Societe Generale, Natixis ва «Газпромбанк» каби хорижий инвестицион банклар ҳамда республикада фаолият юритаётган тижорат банклари ва брокерларга тавсиялар учун сўровномалар юборилган.
Келиб тушган тавсияларни таҳлил қилган ҳолда, UzAuto Motors АЖ томонидан Молия вазирлиги билан биргаликда IPO ҳажми ва шартлари бўйича тендер ҳужжатлари ишлаб чиқилди ҳамда андеррайтерлар консорсиумини танлаб олиш бўйича расмий тендер эълон қилинди. Мазкур тендерда маҳаллий андеррайтерлар билан бир қаторда андеррайтинг фаолиятини олиб борувчи хорижий банклар ва инвестиция воситачилари ҳам иштирок этишлари мумкин.
Маълумот учун
Ўзбекистон Республикаси Президентининг 2022 йил 17 январдаги ПҚ 90-сон қарорига билан 2023 йил 31 декабрга қадар, эксперимент тариқасида хорижий банклар ва инвестиция воситачиларига Ўзбекистон Республикасида алоҳида лицензия олмасдан қимматли қоғозлар бозорида андеррайтинг фаолиятини амалга ошириш ҳуқуқига эга бўлган ва ўз маблағларининг миқдори 500 миллион сўмдан кам бўлмаган маҳаллий юридик шахслар билан шартнома тузган ҳолда андеррайтинг фаолиятини амалга оширишга рухсат берилган.
Расмий тендер Ўзбекистон Республикаси давлат харидлари тўғрисидаги қонунига мувофиқ, Ўзбекистон Республика товар-хом ашё биржаси веб-сайтида эълон қилинди.
Тендернинг тугаш санаси 11.04.2022, 13:00 этиб белгиланди.
UzAuto Motors АЖ томонидан маҳаллий ва хорижий фонд бозорларида IPO амалга оширилиши компания учун янги инвестиция лойиҳаларни амалга оширган ҳолда фаолиятни янада кенгайтириш, инвестицион жозибадорликни ошириш, корпоратив бошқарувни халқаро стандартларга мослаштириш, шаффофлик ва ҳисобдорликни ошириш имконини беради. Шунингдек, мазкур IPO айниқса маҳаллий бозорда инвесторлар учун янги қимматли қоғозлар таклифини шакллантиради ва ликвидлик ошишига ҳисса қўшади.
Маълумот учун
UzAuto Motors АЖ 1993 йилда ташкил топган бўлиб, Ўзбекистон ва Ўрта Осиёдаги ягона йирик автомобиль ишлаб чиқарувчи компания ҳисобланади. Компания томонидан бугунги кунда йилига 360 мингга яқин 12 турдаги автомобиль моделлари ишлаб чиқарилади. Унинг асосий ишлаб чиқарувчи заводи Ўзбекистоннинг шарқий нуқтаси бўлган Андижон вилоятининг Асака шаҳрида жойлашган бўлиб, унда Chevrolet Spark, Nexia 3, Cobalt ва Lacetti моделлари ишлаб чиқарилади. Ўзбекистоннинг ғарбидаги — Хоразм вилоятининг Питнак шаҳрида эса Damas ва Labo автомобиллари ишлаб чиқарилади.
Бугунги кунда компания таркибида 11 мингдан ортиқ (маҳаллий бутловчи қисмларни ишлаб чиқарувчи корхоналар билан ҳисоблаганда 18 мингдан ортиқ) ишчи ва ходимлар фаолият кўрсатиб келмоқда. Компания 2020 йилнинг якуни бўйича 293 минг дона автомобиль ишлаб чиқариш орқали 2,624 миллион доллар соф тушум топган бўлиб, шундан 177 миллион доллари экспорт орқали амалга оширилган.
Компания Chevrolet Onix ва Tracker автомобилларини ишлаб чиқариш лойиҳасини молиялаштириш мақсадида, 2021 йил апрель ойида Лондон фонд биржасида ўзининг илк корпоратив халқаро облигацияларини 300 миллион АҚШ доллари миқдорида, 5 йил муддатга муваффаққиятли жойлаштирди.
Реклама ҳуқуқи асосида.
Изоҳ (0)