Тошкент вилояти Олмалиқ шаҳрида тадбиркордан пора талаб қилган бош муҳандис қўлга олинди, деб хабар бермоқда Иқтисодий жиноятларга қарши курашиш департаменти.

Қайд этилишича, Бош прокуратура ҳузуридаги департаментнинг Олмалиқ шаҳар бўлими томонидан ИИБ билан ҳамкорликда тезкор тадбир ўтказилган. Унда Тошкент сув таъминоти МЧЖ Олмалиқ шаҳар бўлимининг У.У. исмли бош муҳандиси О. номли боғдорчилик-узумчилик ширкатига қарашли ҳудудда тери маҳсулотларини қайта ишлаб чиқариш цехи учун сув қувурини ўтказишга техник шарт ва лойиҳа-смета ҳужжатларини расмийлаштириб беришни ваъда қилгани аниқланган. Эвазига тадбиркор Х.дан 900 доллар пора талаб қилиб, 9,8 миллион сўмни олган вақтида ашёвий далиллар билан ушланган.

Ҳолат юзасидан Жиноят кодексининг 210-моддаси (пора олиш) билан жиноят иши қўзғатилган. Ҳозирда тергов ҳаракатлари ўтказилмоқда.