Санкциялар остида қолган россияликлар Ўзбекистондан кўчмас мулк сотиб ола бошлади

Хориждан кўчмас мулк сотиб олиш истагида бўлган россияликлар энди асосан БАА, Туркия ва Ўзбекистонни танлашади, деб ҳисоблайди «РИА Недвижимост’» сўровномасида иштирок этган мутахассислар.

Жорий қилинган халқаро санкциялар туфайли хорижда кўчмас мулк сотиб олмоқчи бўлган россияликлар эндиликда ўз эътиборларини янги бозорларга қаратишларига тўғри келади.

Бу кунгача Буюк Британия, Испания, Кипр, Греция, Болгария ва Черногория давлатлари россиялик харидорлар орасида энг талабгирлари эди.

Мазкур рўйхатга яқин кунларда Ўзбекистон ҳам қўшилади, деб қатъий таъкидлайди Ника Estate компанияси эгаси Виктор Садигов.

Бу бизнес ривожлантириш ва яшаш шароитлари нуқтаи назаридан жуда қизиқ бозордир. Сармоядорларнинг маълум қисми ўз пулларини Тошкент лойиҳаларига ҳозирданоқ киритишни бошламоқда, — дейди у.

Бироқ талаб бўйича етакчи ўринда Дубай шаҳри турибди, дея тасдиқлайди мутахассислар. Бозор ақл бовар қилмас кўрсаткичларни кўрсатмоқда, январь ойининг ўзидаёқ Дубайдаги олди-сотди битимлар сони ўсиши 80 фоиздан зиёд натижани кўрсатган.

Бундан ташқари, дирҳам курси бозордаги доллар ва евро билан юзага келган вазият каби жиддий ўзгаришни намойиш қилмади.

Аввалроқ Ўзбекистонда январь ойида уйлар сотуви камайгани ҳақида хабар берилган эди.