Наманганда миллатлараро тотувлик ва диний бағрикенгликни тарғиб этишга қаратилган «Ўзбекистон — умумий уйимиз» шиори остидаги фестиваль ўтказилди. Бу ҳақда «Дарё» мухбири Азизбек Абдувалиев хабар бермоқда.
Фестиваль олдидан ташкил этилган кўргазмада вилоятда истиқомат қилаётган турли миллат вакилларининг урф-одатлари, миллий таомлари, қадриятлари ва ҳунармандлик ишлари намойиш этилди.
Тадбирда иштирок этган вилоят ҳокими Шавкат Абдураззоқовнинг қайд этишича, Наманганда бугунги кунда 45 та миллат вакиллари истиқомат қилмоқда. Вилоятдаги тўртта миллий маданий марказ барча шароитларга эга «Дўстлик уйи»да фаолият олиб бормоқда.
Тадбир давомида рус, корейс, қирғиз ва тожик миллий маданий марказлари раҳбарларининг ҳар бирига 50 миллион сўмдан жами 200 миллион сўмлик сертификатлар топширилди.
Фестивальда турли миллат вакилларининг чиқишлари тингланди, куй-қўшиқ ва рақслар ижро этилди.
Тадбир якунланганидан сўнг мутасаддилар турли миллатга мансуб эҳтиёжманд ва бемор фуқароларнинг хонадонларига бориб, уларни йўқлади.
Изоҳ (0)