Гаагадаги Халқаро жиноий суд бош прокурори Карим Хон Украинадаги вазият бўйича «имкон борича тезкор» тергов бошлаш ниятини эълон қилди.
Карим Хон дастлабки маълумотлар билан танишиб чиққан ва тергов бошлаш учун асос борлигига ишонч ҳосил қилган. «Украинада (2013 йилдан буён) ҳарбий жиноятлар билан бирга, инсониятга қарши жиноятлар содир этилган дея ҳисоблаш учун салмоқли асос бор», — дейилади баёнотда. 2020 йилда прокурор офиси Украинадаги вазият борасидаги дастлабки тергов якунлари тўғрисида ҳисобот берганди.
Хоннинг сўзларига кўра, шунингдек, у ўз офиси юрисдиксияси остида бўлган ва «низолашаётган томонларнинг исталган бири» Украина ҳудудидаги янги эҳтимолий жиноятларни содир этгани бўйича тергов бошлаш ниятида.
Прокурор ўз жамоасига ҳозирда барча далилларни ўрганишни буюрган. Унинг таъкидлашича, кейинги қадам судгача бўлган палатага рухсат сўровини юбориш бўлади.
Украина Халқаро жиноий судга аъзо эмас, лекин аввалроқ 2013 йил 21 ноябрдан буён мамлакат ҳудудида содир этилиши мумкин бўлган жиноятлар бўйича суднинг юрисдиксиясини тан олиш тўғрисида иккита ариза топширган.
Россия 24 февралдан бери Украинада «ҳарбий махсус операция» ўтказмоқда. Россия Мудофаа вазирлиги жанговар ҳаракатлар ҳақида хабар бериб, ҳалок бўлган ҳарбий хизматчилар ҳақида маълумот бермаяпти. Россия армияси йўқотишлари тўғрисида урушнинг тўртинчи кунида тан олди, аммо қурбонлар сонини айтмади ва украиналикларникидан «бир неча баравар» кам эканини таъкидлади. Украина Мудофаа вазирлигининг 28 февралдаги маълумотларига кўра, урушда 5300 га яқин россиялик ҳалок бўлган. Украина ўз ҳарбийлари орасидаги қурбонлар сони ҳақида ҳисобот бермаган.
Изоҳ (0)