АҚШда эркак уч фарзандини отиб ташлаб, сўнг ўз жонига қасд қилди

АҚШнинг Калифорния штатида эркак уч нафар фарзанди ва яна бир кишини отиб ўлдирди, сўнг ўз жонига қасд қилди. Фожиа Сакраменто шаҳридаги черковлардан бирида юз берди. Бу ҳақда маҳаллий шериф идорасига таяниб, Reuters хабар берди.

Полицияга отишма ҳақида хабар келиб тушган. Воқеа жойига етиб келган ҳуқуқ-тартибот идоралари ходимлари беш киши, жумладан, уч боланинг жасадини топган, болаларнинг каттаси 15 ёшда бўлган.

Уч фарзанд ва отадан ташқари бешинчи марҳум ҳам шу оиланинг аъзоси бўлганми ёки йўқлиги номаълум.

Январь ойида АҚШда мактаб автобуси ўққа тутилиши оқибатида 15 ёшли ўқувчи ҳалок бўлганди. Ундан аввал Калифорниянинг Сан-Хосе шаҳрида жамоат транспортига техник хизмат кўрсатиладиган марказ яқинида отишма содир этилгани, оқибатда саккиз киши ҳалок бўлгани хабар қилинган.