Ортга қайтган Наманган—Краснодар рейси ёнилғи етарли бўлмагани сабаб Урганчга қўнди

Uzbekistan Airports ортга қайтишга мажбур бўлган Наманган—Краснодар рейси Урганчга қўнганини маълум қилди.

Uzbekistan Airways’нинг Намангандан Краснодарга учган HY-9825 рейси Ростов вилоятидаги ҳаво майдони йўловчи самолётларининг қатновлари учун ёпилиши муносабати билан вилоятга мажбурий қайтарилган эди.

Uzbekistan Airports матбуот хизматининг маълум қилишича, бортида 168 нафар йўловчи бўлган самолёт экипажи ёнилғи миқдорининг камлиги сабаб энг яқин аэропортига қўниш бўйича қарор қабул қилган. Самолёт Урганчга маҳаллий вақт билан соат 09:57 да келиб қўнган. Ҳаво кемасига ёнилғи қуйилгач, у яқин вақтлар ичида Наманганга учиб кетади.

Uzbekistan Airways авиакомпаниясининг аниқлик киритишича, рейси бекор қилинган йўловчилар авиачиптани бепул бронлаш ёки тўлиқ қийматини қайтариб олиш ҳуқуқига эга.

Маълумот учун, Россия президенти Владимир Путин 24 февраль куни Донбассда «махсус ҳарбий операция» бошланганини эълон қилди. Операциядан мақсад «Киев режими томонидан безорилик ва геноцидга учраган» одамларни ҳимоя қилишдир».