«Асосий мақсадимиз Қорақалпоғистон иқтисодиётини ва салоҳиятини икки баробар ошириш» — президент

Шавкат Мирзиёев айни вақтда Беруний тумани фаоллари билан учрашмоқда. «Дарё» мухбирининг хабар беришича, президент ўз нутқида Тахиатош электростанцияси ҳақида гапириб, унинг 65 йил аввал қурилганини ҳамда бугунги кун талабларига жавоб бера олмаслигини таъкидлади.

«Шунинг учун ҳам ҳозирда борларининг қувватини ошириб бориш билан бирга, янги ва инновацион қувватини ҳам йўлга қўямиз. Бизга келадиган инвесторлар энг аввало «газинг, сувинг борми, аэропортларинг ишлаяптими?», деб сўрайди. Биз эса бунга муносиб жавоб беришимиз керак. Навоийда қуёш электр станциясини қурдик, энди навбат шамол энергиясига. Агар бу лойиҳа тўлиқ ишга тушса, 110 минг аҳоли электр энергияси билан таъминланади», — дейди Шавкат Мирзиёев.

«Ҳозир барча раҳбарлар Қорақалпоғистонда. Ҳеч қайси туман эътибордан четда қолмайди. Асосий мақсадимиз Қорақалпоғистон иқтисодиётини ва салоҳиятини икки баробар ошириш. Қораўзакда кон-металлургия барпо этиш бўйича инвесторлар билан музокаралар олиб боряпмиз, бу лойиҳани ҳам бошлаймиз», — дея қўшимча қилди давлат раҳбари.

Шунингдек, йиғилиш давомида сўзга чиққан Европа тараққиёт ва тикланиш банки, шунингдек, ACWA Power компанияси вакили Ўзбекистон билан ҳамкорликдан мамнун эканини билдирди.

Бундан аввал Шавкат Мирзиёев Қорақалпоғистон Республикасининг Беруний туманида шамол электр станцияси (қуввати 100 МВт бўлган) қурилишини бошлаш учун тамал тошини қўйгани ҳақида хабар берилган эди.

Эслатиб ўтамиз, давлат раҳбари ҳудудлар ривожи ва аҳоли ҳаёти билан танишиш мақсадида 23 февралдан буён Қорақалпоғистонда бўлиб турибди. Ташриф уч кун давом этиши режалаштирилган.