Наманган вилоятидаги 6706 та трансформатор пунктининг 2239 таси ёки учдан бир қисми моддий ва маънавий жиҳатдан эскирган, улар 40 йилдан ошиқ вақтдан бери фойдаланиб келинмоқда. Бу ҳақда «Наманган ҳудудий электр тармоқлари корхонаси» акциядорлик жамияти бош директори Жавлон Халилов маълум қилди, дея хабар беради «Дарё» мухбири Азизбек Абдувалиев.
«Бу йил 328 та янги трансформатор пункти ўрнатишни режалаштирганмиз. Яна 1200 километрга яқин электр узатиш тармоқлари тортамиз. Бу ишларнинг барчаси учун 111 миллиард сўмдан ортиқ маблағ сарфлаш кўзда тутилган», — дейди Жавлон Халилов.
Бош директорнинг айтишича, Наманганда электр таъминоти бўйича ҳолати энг оғир бўлган 30 та маҳалла ажратиб олинган ва «қизил» ҳудудга киритилган. Ушбу маҳаллаларда электр тармоқлари, трансформатор пунктлари мукаммал таъмирланади ва янгиланади, темир-бетон таянчлар ўрнатилади. Мутасаддилар ушбу маҳаллаларнинг ҳар бирида бўлиб, аҳоли учун тақдимот ўтказади ва бу ишлар қачон амалга оширилишига аниқлик киритади.
«Аҳоли аксар узилишлар бўлган пайт электр тармоқлари корхоналарига қўнғироқ қилиб тушиб бўлмаслигидан нолийди. Свет ўчган пайт ҳар икки хонадондан бири биз билан боғланишга ҳаракат қилишини тушунтиришга ҳаракат қиламиз. Лекин барибир мижоз ҳақ. Бундай асаббузарликка барҳам бериш учун масъул ходимлар ва усталаримиз телефон рақамларини ижтимоий тармоқларда эълон қилинади, маҳалла раислари ва ҳоким ёрдамчиларига етказилади», — дейди Халилов.
Изоҳ (0)