Ургутдаги Қизилтурк олтин кони 23 млрд сўмга аукционга қўйилди

Самарқанд вилояти Ургут туманида жойлашган Қизилтурк кони кимошди савдосига қўйилди. Лот маълумотлари E-auksion порталида эълон қилинган.

Олтин кони Ургут шаҳридан 35 км узоқда бўлиб Зарафшон—Ҳиссор тоғ тизмаларида жойлашган. Қизлтуркнинг майдони — 1 643 гектар.

Буюртмачи сифатида Давлат геология ва минерал ресурслар қўмитаси кўрсатилган.

Объектдан фойдаланиш учун бир нечта талаблар қўйилган. Лот изоҳида ёзилишича, олтин конига бир йил давомида 20 млн доллардан кам бўлмаган инвестициялар жалб қилиниши керак. Умумий жалб этилиши керак бўлган инвестициялар — 150 млн доллар.

Бундан ташқари 600 тадан кам бўлмаган иш ўринлари яратилиши лозимлиги ҳам қайд этилган.

Аукционга қўйилган коннинг бошланғич баҳоси — 23,69 млрд сўм. Аризалар 24 март 09:00 га қадар қабул қилинади. Савдолар худди шу куни 10:00 да бошланади.

Аввалроқ қўлбола усулда олтин қазиб олиш учун янги ер майдонлари аукционга қўйилгани ҳақида хабар берилган эди.