23 февралдан S7 Airlines авиакомпанияси Екатеринбургнинг Кольцово аэропортидан Фарғонага мунтазам рейсларни амалга оширишни бошлайди. Бу ҳақда аэропорт матбуот хизматига таяниб «Коммерсантъ» хабар бермоқда.
Парвозлар ҳафтада бир марта 164 нафар йўловчини сиғдира оладиган Airbus А320neo самолётида амалга оширилади. Кольцоводан жўнаш чоршанба кунлари Тошкент вақти билан соат 19:25 да, етиб келиш эса соат 22:25 да. Парвоз уч соат давом этади.
Айни пайтда Екатеринбургдан Фарғонага рейслар Урал авиакомпанияси томонидан амалга оширилмоқда. 2021 йил охирида Кольцово аэропротидан Ўзбекистонга бўладиган парвозлар давомида қарийб 90 минг кишига хизмат кўрсатилди.
Эндиликда Кольцоводан Тошкент, Самарқанд, Бухоро, Наманган, Навоий, Урганч ва Фарғонага учиш мумкин.
Аввалроқ Фарғона ва Волгоград ўртасида мунтазам авиқатновлар йўлга қўйилгани ҳақида хабар берилган эди.
Изоҳ (0)