Ижтимоий тармоқларда Тошкент шаҳридаги Абдулла Қодирий боғида 64 та дарахт кўчирилгани тўғрисида хабарлар тарқалди. Тошкент шаҳар экология ва атроф-муҳитни муҳофаза қилиш бошқармаси мазкур ҳолатга муносабат билдирди.
Маълум қилинишича, Олмазор туманидаги Абдулла Қодирий боғи 2022 йилнинг январь ойида давлат инспекторлари томонидан ўрганилган. Ўрганиш жараёнида ушбу боғ ҳудудида қурилиш ишлари олиб борилиши учун ажратилган ер майдонидаги дарахтлар тадбиркор томонидан керакли ҳужжатлар расмийлаштирмасдан, ноқонуний равишда бошқа жойга кўчирилгани аниқланган.
Ҳолат юзасидан инспекторлар жойида баённома расмийлаштириб тадбиркорга Маъмурий жавобгарлик тўғрисидаги кодексининг 79-моддаси (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) 1-қисми билан 1,35 миллион сўм жарима ҳамда ўсимлик дунёсига 7,6 миллион сўм етказилган зарар миқдори белгиланиб, чора кўрилган.
Шунингдек, Тошкентнинг Мирзо Улуғбек туманидаги «Локомотив» футбол майдони ёнидаги боғ ҳудудида таъмирлаш ишлари олиб борилмоқда. Таъкидланишича, Бутунжаҳон тозалик куни муносабати билан ўтган 2021 йил ушбу боғ ҳудудида Давлат экология қўмитаси ташаббуси билан экологик акция ўтказилган
«Боғ ҳудудидаги мавжуд барча дарахтлар тўлиқ хатловдан ўтказилган бўлиб, хавотирга ўрин йўқлигини, ушбу ҳудуд экологларнинг қатъий назорати остига олинганлигини маълум қиламиз», — дейилади хабарда.
«Kun.uz»нинг боғ ҳудудидан ер сотиб олиб, қурилиш қилмоқчи бўлган Хитойнинг Wаn Li компаниясига таяниб ёзишича, хатланган 177 туп дарахтнинг 64 тупи боғ ҳудудидан бошқа ерга кўчириб ўтказилган. Компания қурилиш тугагунига қадар ҳеч қандай дарахтга зарар етказилмаслиги, қайта экилган дарахтлар эса униб чиққунча парвариш қилинишини маълум қилган.
Абдулла Қодирий истироҳат боғи ҳудудида меҳмонхона қурилиши ҳақида 2019 йилнинг ноябрида маълум бўлганди. Ўшанда Тошкент шаҳар ҳокимлиги бу борада япон компанияси билан келишувга эришилганини билдирганди. Ушбу қарор ижтимоий тармоқларда кенг муҳокамаларга сабаб бўлган, аксарият ижтимоий тармоқ фойдаланувчилари ушбу қарорни қоралаганди.
2019 йилда Абдулла Қодирий номини абадийлаштириш, унинг номидаги мажмуа ва уй-музейни замонавий талаблар ва миллий анъаналар асосида барпо этишга қаратилган лойиҳани амалга ошириш натижасида ҳозирда деярли эътибордан четда қолган ҳудудда «Абдулла Қодирий мажмуаси» тимсолида этнобоғ ва этношаҳарча барпо этилиши айтилганди. 2021 йилнинг баҳорида боғ ҳудудида Hampton by Hilton меҳмонхонаси қурилиши маълум бўлди.
Изоҳ (0)