Бугун,

  • USD 11014.01
  • RUB 191.8
  • EUR 10674.78

Ўзбекистон президенти Шавкат Мирзиёев 10 февраль куни Самарқанд вилоятига ташриф буюриб, ҳудуддаги амалга оширилиши режалаштирилган янги лойиҳалар тақдимоти билан танишди. Бу ҳақда «Дарё» мухбири хабар бермоқда.

Фото: «Дарё» / Мадина Нурман

Фото: «Дарё» / Мадина Нурман

Давлат раҳбари Самарқандда тирбандликларни камайтириш ва бартараф этиш учун илмий-амалий марказ қуриш кераклигини таъкидлаган.

«Шаҳарда тезликни камайтириб, тирбандликларни бартараф этиш керак. Авариялар оқибатида кўпгина инсонлар ҳалок бўлмоқда», — деди Шавкат Мирзиёев.

Президент Самарқандда трамвай бор эканини алоҳида қайд этиб ўтган. «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — дейди Шавкат Мирзиёев.

Фото: «Дарё» / Мадина Нурман

Фото: «Дарё» / Мадина Нурман

Президент Самарқандда янги қурилган ерости тоннели, йўлларни кўздан кечира туриб, хавфсиз йўл, хавфсиз пиёда концепциясини яратиш ҳақида сўзлаган ва шундай деган: «Яқинда Тошкентда тезлик кўпи билан 60 километр/соатгача белгилангани ҳақида қарор чиқади».

Фото: «Дарё» / Мадина Нурман

Фото: «Дарё» / Мадина Нурман

Эслатиб ўтамиз, 2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва Ипподром ўртасида қатновчи 17-йўналиш ёпилган ва шу тариқа Тошкент трамвайининг 115 йиллик тарихига нуқта қўйилганди.

2022 йилнинг январь охирларида тележурналист Хайрулла Нуриддинов «Ўзбекистон 24» телеканалида эфирга узатилган «Менимча» кўрсатувида Тошкентга трамвай қатновини қайтариш тарафдори эканини айтиб ўтган эди.

«Шаҳар транспорти мавзуси очилганлигидан фойдаланиб, яна бир таклифни айтмоқчиман. Аҳолига қулай ва сифатли транспорт хизматини кўрсатиш соҳасини такомиллаштириш мақсадида Тошкентга трамвайларни қайтариш керак, менимча. Катта ва гавжум шаҳарга трамвай жуда асқатади. Ҳаммамизнинг эсимизда-ку ўша қулай, бежирим, бир текисда юрадиган, муҳими, экологияга зарар етказмайдиган қадрдон трамвайларимиз. Билмадим, балки хато қилаётгандирман, лекин бу менинг шахсий фикрим. Агар пойтахт мутасаддиларининг ўрнида бўлганимда, ана шу ташаббус билан чиққан бўлардим», — дейганди Хайрулла Нуриддинов.

Маълумот учун, Шавкат Мирзиёев 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз борган.

Изоҳ
Асосий янгиликлар