Бухородаги тўйхонада тирик балиқлардан безак сифатида фойдаланган фуқаро ва тўйхона раҳбари огоҳлантирилди. Бу ҳақда «Дарё»га Экология ва атроф-муҳитни муҳофаза қилиш бошқармаси бошлиғи хабар берди.
21 январь куни ўтказилган никоҳ тўйида меҳмонлар учун ёзилган дастурхонларда шампан виноси ичиладиган идишларга икки донадан тирик аквариум балиқлари солиниб, уларнинг декорация, яъни безак учун қўйилгани ҳақида хабарлар тарқалди. Вилоят Экология ва атроф-муҳитни муҳофаза қилиш бошқармаси бошлиғи Камол Қўзиевнинг маълум қилишича, 23 январь куни бошқарма ходимлари томонидан ҳолат жойига бориб ўрганилди.
Ўрганиш натижаларига кўра, тўйхона раҳбари тўйларда тўйчилар томонидан безатилган бундай декорацияни илк бор кўргани ва ҳайратга тушганини билдирган. Бироқ у тўй эгаси Ш.С.ни огоҳлантирмаган. Унинг айтишича, тўйга келган бир нечта меҳмонлар ўз қизиқишлари боис ҳам шампан виноси ичиладиган идишларга солинган балиқларни олиб кетган ва тўй эгаси бунга ҳеч қандай эътироз билдирмаган.
Шундан сўнг бошқарма ходимлари фуқаро Ш.С. хонадонида бўлган. Ўрганиш давомида безак сифатида фойдаланилган тирик балиқлар фуқарога, яъни тўй эгасига тегишлилиги ва ҳозирги вақтда балиқларнинг барчаси тириклиги аниқланган. Ш.С.нинг сўзларига кўра, балиқлар уйда аквариумда етиштирилган. Бирортаси ўлмаган.
«Жами 45 дона балиқларимнинг ҳаммаси тирик. Мана, уйга қайтариб олиб келдик. Балиқларнинг ўлгани ҳақидаги хабарлар ёлғон. Фақат бир нечтасини тўйимизга келган меҳмонлар ва яқин қариндошларимиз ўзлари билан олиб кетишди», — деган тўй эгаси.
Ўзбекистон Экологик партияси вилоят кенгаши ОАВ ва ёшлар билан ишлаш бўйича бош мутахассиси Малика Шукруллоеванинг билдиришича, Бухоро шаҳар ички ишлар бўлими томонидан тўйхона раҳбари ҳам, тўй эгаси ҳам Маъмурий жавобгарлик тўғрисидаги кодекснинг 111-моддаси (ҳайвонларга нисбатан шафқатсиз муносабатда бўлиш) билан огоҳлантирилган. Бундай ҳолат такрорланса, қонуний жавобгарликка тортилиши билдирилган.
Эслатиб ўтамиз, 2019 йилнинг сентябрида Олий Мажлис Сенати кенгаши ҳамда Олий Мажлис Қонунчилик палатаси кенгашининг қўшма мажлисида тўй-ҳашамлар, оилавий тантаналар, маърака ва маросимлар борасида сўз юритилганди. Октябрда эса Олий Мажлис Сенати тўйлар, оилавий тантаналар, маърака ва маросимлар ўтказилишини тартибга солиш тўғрисидаги низомни эълон қилганди. 2020 йил 1 январдан бошлаб, тўй-ҳашамларни тартибга солиш ҳақидаги Сенат ва Қонунчилик палатасининг қўшма қарори (юридик жиҳатдан кучи қонунга тенг) кучга кирган. Маъмурий жавобгарлик тўғрисидаги кодексга тўйларни ўтказиш тартибини бузганлик учун жавобгарлик белгиланган эди.
Изоҳ (0)