Эркак киши нафақат оиланинг, балки жамият ва юртнинг поспонидир. Улар сабаб юртда хотиржамлик, оилада барқарорлик ҳукм суради. 14 январь — Ватан ҳимоячилари куни муносабати билан шу соҳа вакилларининг оиласида улғайган ва ҳарбий инсонлар билан оила қурган санъат вакиллари ҳақида маълумот беришга қарор қилдик.
Озода Нурсаидова — подполковникнинг қизи
Хонанданинг дадаси Парпи Нурсаидов узоқ йиллар ички ишлар тизимида фаолият юритган. Оилада қатъиятли, сабрли ва меҳнатсевар инсон бўлгани учун фарзандларидан ҳам худди шу фазилатлар эгаси бўлишларини талаб қилган.— Дадам подполковник даражасига эришган, айни кунларда эса онам билан кексалик гаштини суришмоқда, — дейди Озода Нурсаидова.
Луиза Расуловани отадан айирган ҳалокат
Актриса Луиза Расулованинг отаси ички ишлар ходими бўлиб ишлаган. Афсуски, Луиза эсини энди таний бошлаган пайтда, бир кунда икки яқин инсони: отаси ва опасидан айрилган. Уларнинг вафотига автоҳалокат сабаб бўлган.
Мадина Мумтоз майор отаси билан фахрланади
Актриса Мадина Мумтознинг отаси Баҳриддин Мусаев узоқ йиллар ички ишлар соҳасида фаолият юритган. Актриса отаси билан боғлиқ ёрқин хотиралари кўплиги ва вафотидан сўнг уни янада кўпроқ яхши кўришини сезганлигини яширмайди.— Дадажоним очиқкўнгил, камтар, самимий ва меҳнатсевар инсон эди. Шу боис умрининг сўнгги кунига қадар эл-юрт равнақи учун хизмат қилди. Майор Баҳриддин Мусаевнинг қизи эканлигимдан ҳамиша фахрланаман, — дейди Мадина Мумтоз.
Шаҳло Зоирова: «Отам ҳарбий бўлишимни истаганди»
«Браво» кулги жамоасининг аъзоси Шаҳло Зоированинг дадаси ҳам ички ишлар соҳасида фаолият юритган. Шу боис у қизининг ички ишлар академиясида ўқишини ва ҳарбий форма кийишини истаганди. Аммо у кутилмаганда актрисаликни танлади.— Дадам ички ишлар ходими бўлгани учун тартибни яхши кўради, фарзандларни ортиқча эркалатмасди. Болаликдан касбига ҳавас қилганим учун икки марта Ички ишлар академиясига ҳужжат топширганман. Афсуски, жисмоний имтиҳонлардан аъло баҳо олиб, тестдан йиқилганман, — дейди Шаҳло Зоирова.
Дурдона Қурбонованинг отаси жиноятчиликка қарши курашади
Актриса Дурдона Қурбонованинг отаси ички ишлар соҳасида фаолият юритади. У узоқ йиллардан буён жиноятчиликка қарши курашмоқда. Балки шу боис у қизи Дурдонанинг санъаткор бўлишини истамагандир.
Вазира Юнусовага ҳарбий куёв излашган
Актриса Вазира Юнусованинг буваси Тўйчиамин бобо ҳам ички ишлар тизимида фаолият юритган. Шу боис у набираси Вазирани ҳам шу соҳа вакилига турмушга берган.Вазира Юнусованинг турмуш ўртоғи Иброҳим Юсупов бир неча йил ички ишлар тизимида фаолият юритган. Айни кунларда эса ҳуқуқшунос бўлиб ишламоқда.
Уруш қатнашчисининг набираси
«Опа-сингиллар» сериалидаги иштироки билан томошабинларга яхши таниш бўлган актриса Наргиза Рўзибоеванинг бобоси Мамаюсуф Мирбобоев Улуғ ватан уруши қатнашчиси бўлган. Актриса бобоси билан боғлиқ воқеаларни қуйидагича баён қилди.— Бобом қаттиққўл ва меҳнатсевар инсон эди. Адашмасам, 60 йил боғдорчилик бригадасида раҳбар бўлиб ишлаган. Бобом 2014 йил 90 ёшида оламдан ўтди, — дейди актриса Наргиза Рўзибоева.
Ҳарбий инсон билан оила қурган
«Туташ тақдирлар» сериалидаги раққоса қиз ролини ижро этган Нафиса Мамадиёрова ҳам ҳарбий инсон билан оила қурган. Ҳозирда уларнинг бир ўғил ва бир қизи бор.— Турмуш ўртоғим Аъзамжон Мамадиёров ҳарбий соҳада фаолият юритади. Шу боис мен ҳам салкам ҳарбий бўлиб қолганман. Чунки бу соҳа вакиллари аниқ режа асосида иш қилишади, — дейди Нафиса Мамадиёрова.
Мавзуга доир: Ўзбекистонлик машҳурлар ҳарбий хизматни қаерда ўтаган?
Изоҳ (0)