Қашқадарёда пистолет ва электрошокер билан фуқаронинг пул ва буюмларини тортиб олган шахслар ушланди

Қашқадарё вилояти Чироқчи туманида фуқаронинг кўп миқдорда пул ва буюмларини босқинчилик йўли билан ўмарган шахслар қўлга олинди, дея хабар қилмоқда Тергов департаменти.

Қайд этилишича, 2021 йил 25 декабрь куни соат 16:30 ларда Чироқчи тумани Қарши–Самарқанд автомобиль йўли четида 27 ёшли У.Л.нинг бошқарувида бўлган Matiz автомашинасида таниши билан гаплашиб ўтирганида уларнинг ёнига Nexia-2 келиб тўхтайди.

Ушбу автомашинадан уч нафар номаълум шахслар тушиб, «ёрдам керак эмасми, сизни бир минутга мумкинми, гапимиз бор» деб, уни ўзларининг автомашинасига миндириб, сўнг уни пистолет, электрошокер қурилмаси ва чопқи пичоғи билан қўрқитиб, ҳаёт учун хавфли бўлган зўрлик ишлатади.

Зўравонлар У.Л.нинг ёнида бўлган 1 820 000 сўм, 701 АҚШ долларини, бир дона нархи 2 500 000 сўмлик Samsung А22, бир дона 700 000 сўмлик iPhone 5s телефонини, автомашинасига ўрнатилган бир дона нархи 100 АҚШ доллари бўлган Т99 видеорегистраторини, бир дона нархи 70 000 сўмлик 8 ГБ флешкасини ва икки дона нархи 10 000 сўмлик ўт олдиргич («зажигалка»)ни тортиб олиб ҳодиса жойидан яширинади.

Олиб борилган тезкор-қидирув натижасида ушбу жиноятни 20 ёшли Ж.Э., 21 ёшли Р.О. ва 24 ёшли А.С. содир қилгани аниқланиб, улардан бир дона пневматик тўппонча (ўқлари ва газ балончалари билан), бир дона электрошокер қурилмаси, бир дона Т99 видеорегистратор, бир дона Samsung А22 ва бир дона iPhone 5с телефон, 1 196 000 сўм пул, бир дона рюкзак сумка ҳамда бир жуфт қўлқоп ашёвий далил тариқасида расмийлаштириб олинган.

Мазкур ҳолат юзасидан Чироқчи тумани ИИО ФМБ ҳузуридаги Тергов бўлими томонидан Ж.Э., Р.О., ва А.С.га нисбатан Жиноят кодексининг 164-моддаси 2-қисми «а, б» бандлари (қурол ёки қурол сифатида фойдаланиш мумкин бўлган бошқа нарсаларни ишлатиб ҳамда бир гуруҳ шахслар томонидан олдиндан тил бириктириб содир этилган босқинчилик) билан жиноят иши қўзғатилиб, гумон қилинувчилар процессуал тартибда ушланганлар.

Тергов ҳаракатлари давом этмоқда.

Маълумот учун, юқоридаги модда билан айбдор деб топилган шахслар 8 йилда 10 йилгача озодликдан маҳрум этилиши мумкин.