Қашқадарё вилояти Китоб туманидан ўтган М-39 автомобиль йўлининг Тахтақорача довони 26 декабрь куни соат 11:00 дан вақтинча ёпилди. Бу ҳақда Фавқулодда вазиятлар вазирлиги хабар қилди.
Маълум қилинишича, тинимсиз ёғган қалин қор оқибатида йўлнинг юза қисмида музламалар ҳосил бўлган.
«Айни дақиқаларда вазият оқибатларини бартараф этиш борасида кенг кўламли профилактик ишлар амалга оширилмоқда«, — дейилади ФВВ ахборотида.
Йўл ҳаракати хавфсизлиги бош бошқармаси ҳолат бўйича қўшимча маълумот берди. Самарқанд ва Қашқадарё вилоятларини боғловчи довонда автотранспорт воситалари ҳаракати вақтинча тўхтатилган. Музламаларни эритиш учун қум-туз аралашмалари сепилиб, зарурий чоралар кўрилмоқда.
«Ҳайдовчилардан эҳтиёткор бўлишларини, об-ҳаво ва йўл шароитини инобатга олиб транспорт воситасини бошқаришларини сўраймиз», — дея ЙҲХББ ҳайдовчиларга мурожаат қилган.
Эслатиб ўтамиз, Тахтақорача довони 13 декабрь куни ҳам қалин қор ёғгани сабаб ёпилганди. 14 декабрга келиб довонда автомобиллар ҳаракати тикланган.
Изоҳ (0)