Тошкент шаҳридаги 3 нафар туман ҳокимига қўшимча устама маблағ берилиб, 3 нафар ҳокимга жарима тайинланди. Шаҳар ҳокими Жаҳонгир Ортиқхўжаев тегишли қарорни қабул қилди.
Қайд этилишича, шаҳарда ҳудудларнинг ижтимоий-иқтисодий ривожлантиришни рейтинг баҳолаш натижаларига мувофиқ «яхши» баҳоланган Миробод тумани ҳокими Шухрат Пулатов, Бектемир тумани ҳокими Тапил Маҳамадзияев ва Янгиҳаёт тумани ҳокими Хаёт Инагамов, уларнинг ўринбосарлари ҳамда сектор раҳбарлари маошига 30 фоиз устамалар тегишли маҳаллий бюджетларнинг қўшимча манба маблағлари ҳисобидан белгиланган.
Эслатиб ўтамиз, 7 декабрь куни Қўйлиқда йўл инфратузилмасини яхшилаш, коммуникация тармоқларини такомиллаштириш ва тирбандликларнинг олдини олиш мақсадида Тошкентдаги энг йирик бозорлардан бири «Қўйлиқ» бошқа манзилга кўчирилиши хабар қилинганди. 9 декабрь куни эса «бозор бузилишидан норози одамлар» катта автойўлни тўсиб қўйган. Бектемир туман ҳокими Тапил Маҳамадзияев эса ҳолатга муносабат билдириб, «Ўзим ҳам Қўйлиқдан бозор қиламан, лекин уни кўчирмасак бўлмайди», — деганди.
Шунингдек, «қониқарсиз» баҳоланган Шайхонтоҳур тумани ҳокими Абдуқаҳҳор Тўхтаев, Учтепа тумани ҳокими Фарҳод Абдуллаев ва Сергели тумани ҳокими Элбек Шукуров, уларнинг ўринбосарлари ҳамда сектор раҳбарларига нисбатан ойлик иш ҳақидан 30 фоиз жарима жазоси қўлланилган.
Сергели тумани ҳокими Элбек Шукуров «меҳнатда ташаббускорлигини рағбатлантириш» мақсадида ўзига 35 миллион сўм миқдорда устама ҳақи белгилаш тўғрисида қарор қабул қилганди. Унинг Alter Ego лойиҳасига берган интервьюсида айтишича, туман ҳокимларининг ойлиги 5-6 миллион сўм атрофида.