Шавкат Мирзиёев Ғузордаги Uzbekistan GTL заводини ишга тушириш маросимида иштирок этади

25 декабрь куни президент Шавкат Мирзиёев Қашқадарё вилояти Ғузор туманида барпо этилган Uzbekistan GTL заводини ишга тушириш маросимида иштирок этади. Бу ҳақда давлат раҳбарининг матбуот котиби Шерзод Асадов маълум қилди.

Маълум қлинишича, янги корхона GTL, яъни «газни — суюқликка» технологияси асосида йилига 3,6 миллиард метр куб табиий газни қайта ишлаб, 1,5 миллион тонна тайёр маҳсулотлар — авиакеросин, дизель ёқилғиси, нафта, суюлтирилган газ ишлаб чиқариш қувватига эга.

Бундай завод шу пайтгача жаҳонда фақат 4 та давлатда – Қатар, Нигерия, ЖАР ва Малайзияда барпо этилган.

Таъкидланишича, давлат раҳбарининг вилоятга ташрифи чоғида, шунингдек, Шўртан газ-кимё мажмуасининг ишлаб чиқариш қувватини кенгайтириш лойиҳасига ҳам тамал тоши қўйилади.

Эслатиб ўтамиз, 2020 йилнинг 21 октябрь куни Қашқадарё вилояти Ғузор туманида қурилаётган Uzbekistan GTL заводида ишчиларнинг оммавий тартибсизлиги юз берган. Қурилиш ишларини амалга ошираётган Enter Engineering компанияси тартибсизлик тонгда ишчилар учун мўлжалланган ошхонанинг моноблок ускунаси (электрон ўтказиш тизими)да техник носозликлар юзага келгани боис улар ўз вақтида нонуштага кира олмагани сабабли юз берганини маълум қилди.

Завод масъули Шуҳрат Арзиев ОАВ вакиллари билан мулоқотда Uzbekistan GTL заводи қурилишидаги ишчиларнинг оммавий норозилигига уларнинг иш куни кўпайиб, дам олиш куни ўзгаришсиз қолгани ҳам сабаб бўлганини айтган. Uzbekistan GTL бош директори Фахриддин Абдурасулов тўполон кўтарган ишчилар масаласига тўхталиб, карантин сабаб уларнинг иш куни ортиб, дам олиш куни ўзгаришсиз қолгани сабаб ишчиларда руҳий толиқиш бўлганини маълум қилганди.

Энергетика вазирлигининг ҳолат юзасидан 21 октябрь куни берган баёнотида таъкидланишича, объектда иш ҳақини тўлаш билан боғлиқ муаммолар юзага келмаган — тўловлар ўз вақтида амалга оширилган. Бундан ташқари, Enter Engineering компанияси томонидан ишчиларнинг қулай турмуши ва меҳнат фаолиятини олиб бориши учун зарур барча шароитлар яратилган. Касаба уюшмалари федерацияси эса заводда юз берган тартибсизлик сабабларини ўрганиш мақсадида ишчи гуруҳи тузиб, 14 та саволдан иборат анкета орқали уч кун давомида 1500 га яқин ишчи билан мулоқот ўтказган.

Кейинроқ Uzbekistan GTL заводини қураётган Enter Engineering компанияси Меҳнат кодексининг 161-моддасини, яъни меҳнатга ҳақ тўлаш тартибини қўпол равишда бузгани маълум қилинганди.