Малайзияда йирик сув тошқинлари оқибатида 25 мингдан ортиқ одам уйларини ташлаб кетишга мажбур бўлди. Бу ҳақда Bernama агентлиги хабар берди.
Маҳаллий ҳокимият сув босган ҳудудлардан аҳолини эвакуация қилиш учун 66 мингдан ортиқ полиция ходимлари, армия ва ўт ўчирувчиларни жалб қилган.
Тошқинларда мамлакатнинг Селангор штати энг кўп зарар кўрган, ушбу ҳудуддан 15 минг киши 100 дан ортиқ ёрдам марказларига эвакуация қилинган.
Табиий офат туфайли ўнлаб автомобиль йўллари ёпилди, қуруқликдаги қатновлар тўхтатилди, дейилади хабарда.
Аввалроқ Бразилия шимоли-шарқида кучли ёмғир сув тошқинларини келтириб чиқарганди. Оқибатда минглаб одамлар вақтинчалик бошпана излашга мажбур бўлган, камида етти киши ҳаётдан кўз юмган.
Декабрь бошида Австралиянинг Квинсленд штатини сув босиб, оқибатда икки киши ҳалок бўлганди, мингга яқин киши уйларини ташлаб кетган.
Изоҳ (0)