«Гарри Поттер» мухлислари кинофраншизанинг 20 йиллигига бағишланган махсус эпизоднинг эфирга узатилишини интиқлик билан кутмоқда. Янги қисм экран юзини кўриши муносабати билан бош қаҳрамонларни гавдалантирган асосий актёрлар суратга тушгани эвазига қанча маблағга эга бўлгани ҳақида маълумот бериб ўтамиз.
Руперт Гринт ва Эмма Уотсон
«Гарри Поттер ва Феникс ордени» (Harry Potter and the order of the Phoenix)да суратга тушгани учун Руперт ва Эммага 4 миллион доллардан маблағ тўланган. Бу ҳали хамир учидан патир. «Гарри Поттер ва ажал туҳфаси» (Harry Potter and the deathly hallows)нинг биринчи ва иккинчи қисмларида иштирок этгани эвазига уларнинг ҳар бири 30 миллион долларга эга бўлган.
Дэниэл Редклифф
Учовлон орасида Дэниэл Редклифф энг кўп ҳақ тўланган актёрлигига шубҳа бўлиши мумкин эмас. Афсунгар болакай ҳақидаги фильмнинг биринчи қисмидан 1 миллион доллар олган Редклиффга «Гарри Поттер ва Феникс ордени»да суратга тушгани учун 14 миллион доллар тўланган. «Гарри Поттер ва ажал туҳфаси» эса энг кўп ҳақ тўланган қисм бўлган. Унинг биринчи ва иккинчи қисмидаги иштироки учун актёр 40 миллион долларга эга бўлган.
Аввалроқ премьераси 2022 йилнинг 1 январь куни бўлиб ўтиши кутилаётган махсус фильмнинг биринчи тизери тақдим қилингани ҳақида хабар берилганди.
Изоҳ (0)