Болливуд юлдузи Айшвария Рай «Панама архиви» иши юзасидан тергов қилинади

1994 йилги «Дунё гўзали» танловининг ғолиби, ҳиндистонлик машҳур актриса Айшвария Рай «Панама архиви» иши — офшор ҳисоб рақамлар ҳақидаги маълумотларни ўз ичига оладиган махфий маълумотларнинг сизиши юзасидан текширувга чақиртирилди. Бу ҳақда The Indian Express маълум қилди деб ёзади Esquire.

Таъкидланишича, 11,5 миллион «Панама ҳужжатларининг», тахминан, 12,5 мингтаси ҳиндистонлик фуқароларга тегишли. Рўйхатдан, шунингдек, Айшвария Райнинг қайнотаси Амитабҳ Баччан ҳам ўрин олган. У ҳам келини сингари текширувга чақиртирилган.

Маълумотларга қараганда, 2005 йилда Баччанлар оиласи Британиянинг Виргин оролида Amic Partners Limited номли офшор компанияга асос солган. Компания орадан 3 йил ўтибгина ёпилган. Қайд қилинишича, актриса хориж валютасидан фойдаланиш тўғрисидаги қонунни бузганлик айблови билан сўроқ қилинмоқда. Аммо ҳали расмий айблов эълон қилинмаган.

Маълумот учун, Вашингтонда жойлашган журналистлик тадқиқотларининг халқаро консорсиуми (ICIJ) офшорларга доир «Панама ҳужжатлари»нинг маълумотлар базасини 2016 йилда ошкор қилган. У амалдаги ва собиқ раҳбарлар, сиёсатчилар, тадбиркорлар, спортчи ва менежерларнинг офшор ҳисоб рақамларига оид маълумотларни ўз ичига олган. Ушбу маълумот хорижий компанияларни рўйхатга олиш билан шуғулланадиган Mossack Fonseca компанияси маълумотлар базасидан ахборот чиқиб кетиши натижасида пайдо бўлган эди. Чоп этилган материаллар бир қатор мамлакатларда текширувлар бошланишига асос бўлган.