Маълум бўлишича, қишки пойабзалларни тозалашда шунчаки губка билан кифояланмаслик керак. Уларнинг бир мавсумдан кўпроқ вақт хизмат қилиши учун қандай парвариш қилиш кераклиги ҳақида қуйида танишиб чиқиш мумкин.
Кирни артиб олинг
Мавсумий пойабзалларни узоқ вақт кийиш учун ҳар куни унга камида бир неча дақиқа ажратиш керак. Дастлаб пойабзал юзасидаги кир, чанг ва қуриб қолган лойларни жуда яхши сиқилган салфетка ёки қуруқ мато билан артиб олиш зарур.
Батареяда қуритманг
Сифати қандай бўлишидан қатъи назар, қишки пойабзални ҳеч қачон нам ҳолатда киймаслик керак. Тери, замш ва бошқа материаллар ташқи томондан ҳам, ичкаридан ҳам намликни ўтказади. Шунингдек, пойабзални батареяда қуритиш тавсия этилмайди, у табиий равишда қуриши лозим, акс ҳолда пойабзал ёрилиши, қорайиши ва деформацияланиши мумкин. Биринчи марта ҳеч нарса содир бўлмаслиги мумкин, лекин бу мунтазам равишда амалга оширилса, албатта, чидамлилигини қисқартиради.
Пойабзал шаклини сақлаб қолинг
Сув ўтган пойабзални энг аввало шаклини сақлаб қолишга ҳаракат қилиш лозим. Бунинг учун махсус ёғоч ёки картон тиргакдан фойдаланиш мумкин. Агар иккаласи ҳам бўлмаса, этикларнинг ички қисмини қоғоз билан тўлдириш тавсия этилади.
Этикларни мунтазам кийманг
Иш ёки ўқиш вақти тугагач, этикларга ҳам бироз дам бериш лозим. Айрим этиклар секин қурийди. Шунинг учун нам бўлса, эртаси куни уларни кийиш тавсия этилмайди. Ҳар қандай сотувчи этик сотиб олаётган мижозга улардан қандай фойдаланиш ва кетма-кет ҳар куни кийиш мумкин эмаслигини айтиб ўтиши лозим. Одатда нам чарм этиклар 24 соат, замш этиклар эса бир неча кун ичида қурийди.
Уйдан чиқишдан олдин чарм пойабзалларингизни тозаланг
Пойабзал креми терини юмшатувчи, сув ҳамда кирни қайтарувчи моддаларни ўз ичига олади, шунинг учун ҳар доим кўчага чиқишдан олдин чарм этикларни тозалаш зарур. Айниқса, қорли мавсумда пойабзалга суртилган крем сув ўтишининг қисман олдини олади.
Замш пойабзални қуруқ ҳолда тозаланг
Замш пойабзаллари сув ва лойдан азият чекади, шунинг учун ёғингарчиликда ва, албатта, ҳар куни ҳам кийиш керак эмас. Замшни махсус чўтка билан тозалаш керак, металл ёки бошқа чўткалар унга зарар етказиши мумкин. Шунингдек, этикни ҳўл вақтида ҳам тозалалаб бўлмайди, аксинча, замш оёқ кийим юзаси қуригач дарҳол тозалаш тавсия этилади.
Чарм оёқ кийим нам мато билан тозаланиши мумкин
Одатда чармни нам мато билан тозалаш мумкин. Чарм пойабзаллари учун ишлатиладиган мумга асосланган маҳсулотлар чарм ўрнини босувчилар учун мос эмас. Мум сўрилмайди, лекин пойабзални плёнка билан қоплайди ва кўпроқ чанг тортади.
Оёқ кийим учун болалар ёки қўл кремини ишлатманг
Кўпчилик болалар креми ёки қўл креми пойабзални ажойиб ҳимоя қилади, деб ўйлайди, аммо бу ундай эмас. У этикларни чанг тортадиган ёғ билан қоплайди ва охир-оқибат хиралашади. Юмшоқ чарм пойабзалларни вазелин, болалар креми ёки кунгабоқар ёғи билан ёғлаш яхши фикр эмас. Кейинчалик, бундай пойабзалларни таъмирлаш муаммо туғдиради, чунки уларни ёпиштириш қийин.
Оёқ кийим губкасидан воз кечинг
У фақат вақти-вақти билан биринчи ёрдам сифатида ишлатилиши мумкин. Оёқ кийимларни губка билан доимий равишда тозалаш фақат зарар келтиради. Гап шундаки, арзон ва қулай бўлган бундай губкалар силиконни ўз ичига олади, бу эса пойабзалга тезда чиройли кўриниш беради, лекин тешикларни ёпиб қўяди ва пойабзал «нафас олишни» тўхтатади.
Силикон пойабзалнинг ялтирашини таъминлайди ва намликни қайтара олади, лекин у маҳсулот таркибида энг кам миқдорда бўлиши керак. Агар губка мунтазам равишда ишлатилса, пойабзал ва этикларнинг териси тезроқ қарийди, хиралашади, ёрила бошлайди ва баъзи ҳолларда қорайиши мумкин.
Яна бир нохуш ҳолат: пойабзалнинг тешиклари тиқилиб қолганлиги сабабли, оёқлар ҳам нафас олмайди, натижада ёқимсиз ҳид пайдо бўлади. Шунингдек, нам пайпоқ ичида оёқлар тезда музлайди.
Изоҳ (0)