«Масхарабоз» фильмидаги актёр Эргаш Мўминов нега экранларда кўринмай қолди? (фото)

«Масхарабоз» фильми билан томошабинларга яхши таниш бўлган Эргаш Мўминовни кўпчилик актёр деб билади. Аммо, у актёр эмас, 30 йиллик тажрибага эга режиссёр ҳисобланади. У экранда эмас, балки кадр ортида меҳнат қилишни афзал кўради.

«Синфдошларим сабаб кастингда иштирок этганман»

— Бобом раҳматли уруш йилларида киномеханик бўлиб ишлаган. Шу боис кино соҳаси оиламизга бегона эмасди.Болалик пайтларимизда кинокастинглар ҳақидаги эълонлар ҳам газетада чоп этиларди. Синфдошларим шундай эълонлардан бирини кўриб, сен ҳам «Ўзбектелефильм»га бор деб ҳоли-жонимга қўйишмади. Улар сабаб илк марта «Ўзбектелефильм»га келиб, фотокастинг топширгандим. Шундан сўнг 1988 йили Шуҳрат Аббосовнинг «Кичкина бола катта урушда» фильмида илк эпизод ролимни ижро этганман. Орадан уч йил вақт ўтиб, Зулфиқор Мусоқовнинг «Абдуллажон» фильмида Болтабой ролини ижро этдим. Фильмда суратга тушиш билан бирга режиссёр ассистенти сифатида ҳам фаолият юритганман. Билишимча, Зулфиқор ака «Ўзбектелефильм»да сақланиб қолган расмларимни тасодифан кўриб, мени ролга тасдиқлаган экан.

«Абдуллажон»даги кетмон учишининг сири нимада?

— 1990 йилда суратга олинган «Абдуллажон» фильми катта шов-шувларга сабаб бўлган. Чунки у пайтда монтажлар у қадар ривожланмаган, монтаж ҳам киноплёнкада амалга ошириларди. Кетмон учиши билан боғлиқ барча саҳналар «Ўзбекфильм» киностудиясининг павильонида суратга олинган. Катта тарвуз билан боғлиқ саҳналарнинг табиий чиқишида рассомларнинг ҳиссаси катта бўлган. «Абдуллажон» фильми Тошкент вилоятидаги Ўртасарой деган қишлоқда суратга олинганди. Киносевар халқ бизга катта ёрдам беришган. Кино тарихига ҳурмат сифатида Бозорбой аканинг уйини ҳам ҳалигача сақлаб қўйишган.1990 йили режиссёр бўламан, деб изланиб юрган ёш йигит эдим. Зулфиқор Мусоқов билан ишлаб жуда кўп нарсаларни ўргандим. Бир йилдан сўнг санъат институтининг режиссёрлик бўлимида ўқишга қабул қилиндим.

«‘Масхарабоз’ фильмидаги ролдан умидимни узгандим»

— «Масхарабоз» фильми 1994 йил Наманган вилоятининг Чортоқ туманидаги қишлоқда суратга олинганди. У пайтда мен институтнинг 2-босқичида таҳсил олардим. Ҳамма қатори мен ҳам фильм учун кастинг топширдим. Мен билан бирга машҳур актёрлар ҳам кастингда иштирок этишаётгани учун ролдан умидимни узгандим. Чунки икки йил давомида ижодкорлар «жим» бўлиб қолишди. Фильмнинг сценарий муаллифи ва режиссёри Шароф Бошбеков мени бош ролга тасдиқлаб қўйган экан. Бундан жуда қувондим. Чунки ёш талаба учун Машраб Кимсанов, Шафоат Раҳматуллаева каби ижодкорлар билан суратга тушиш бахт эди. «Масхарабоз» Раъно Зокирова ва камина учун катта мактаб ролини ўтаган.

«‘Азизим’ қўшиғи 27 йилдан буён айтилади» 

— Фильм кутилганидан ҳам катта машҳурликка эришган. Фильм саундтреки бўлган «Азизим» қўшиғи ўз даврининг шлягер таронаси бўлган. Козим Қаюмов ва Зайнаб Ниғматуллаева томонидан ижро этилган қўшиқ ҳамон ёш хонандалар томонидан ижро этилади. Менимча, 27 йил аввал ижро этилган қўшиқ ҳамон ширасини йўқотгани йўқ.

«Мен актёр эмасман»

— «Нега фильмларда кам суратга тушасиз?» деб кўп сўрашади. Мен актёр эмасман, аммо яхши ролга таклиф этишса, рад ҳам этмайман. «Масхарабоз» фильмида сўнг «Чашма», «Забаржад», «Аразласанг, ўламан», «Аросат» ва «Дада» фильмларида суратга тушдим. Ролнинг катта-кичиклиги аҳамиятсиз, муҳими унинг фильмда ўз ўрни бўлсин, дейман.

— 1994 йилдан буён «Ўзбектелефильм» студиясида фаолият юритаман. Афсуски, кейинги пайтларда режиссёрлик нима эканлигини билмаса-да, пул сарфлаб сериал олаётганлар сони ортиб кетди. Давлат телевидениесида бундай муаммо йўқ. Аммо хусусий телеканаллар раҳбари «режиссёр» билан келишса, олиб келганини эфирга чиқаришяпти. Бу жуда ачинарли ҳол. Бунинг жабрини яна томошабин тортади.

Ҳозирда 30 қисмли сериал устида ишлаяпман. Тайёргарлик ишлари якунлангач, суратга олишни бошлаймиз. Ярим йил фикр-у, хаёлим ана шу сериалда бўлади. Баъзи хусусий сериалчиларга ўхшаб, 2 ойда 60 қисмдан иборат сериални олиш қўлимиздан келмайди. Сони бор-у, сифати йўқ сериал олгандан кўра олмаган яхши.

Эслатиб ўтамиз, режиссёр Эргаш Мўминов 1973 йил 18 январь санасида таваллуд топган. Бугунги кунда у Ўзбекистон миллий телерадиокомпаниясида режиссёр сифатида фаолият юритади. Шу йилнинг апрель ойида у суратга олган «Орзулар қанотида» мюзикл комедиясининг премьераси бўлиб ўтганди.