Сурхондарёдаги Денов шаҳри марказида жойлашган, халқ тилида ҳамон «Юбилейний» деб аталувчи «Indenim» савдо марказида 7 декабрь куни соат тонг 03:57 да кучли портлаш содир бўлиб, ёнғин келиб чиққани ҳақида хабар берилган эди. Дастлаб ҳодиса оқибатида тан жароҳати олган 9 киши касалхонага ётқизилгани, кейинчалик вайроналар остидан икки кишининг жасади топилгани маълум қилинди. «Дарё» мухбири Денов шаҳрида бўлиб, воқеа жойидан репортаж тайёрлади.

Ҳодиса гувоҳларининг сўзларига кўра, портлаш тўлқини ва овози шу қадар кучли бўлганки, бир неча юз метр масофадаги (айрим манбаларга кўра, ҳатто 2 километр масофадаги) бино ва иморатларнинг эшик-деразаларини очиб юбориб, дераза-ойналарини синдириб ташлаган.

«Кеча соат тахминан 02:00 гача телевизор кўриб, кейин ётдим. Уйқида эканман, ҳовли ва уй хоналари бирдан ёришиб, гумбурлаган даҳшатли овоз эшитилди, — деб эслайди деновлик Шоди Мирзаев. — Ўрнимдан сакраб туриб, устимга синиб тушган дераза синиқларини олдим ва атрофга қарадим. Уйнинг ‘свети’ ўчган экан. Ҳамма жойда дераза ва эшиклар сина бошлади. Эшикларнинг ғачур-ғучур овози эшитилди. Ҳаммаёқни чанг-тўзон қоплаган экан. Кўчада одамларнинг ‘ёрдам беринглар’ деган чинқириғи эшитиларди. Амаллаб кўчага чиқсам, уйимиз олдидаги катта супермаркетда ёнғин бўлаётган экан. Одамлар жуда кўп эди. Бир аёл ва эркакни кўрдим — қонга беланган. Ёрдам беринглар, дея бақирарди. Уларни тез ёрдам машинаси олиб кетди».

Фото: «Дарё»

Фото: «Дарё»

Фото: «Дарё»

Фото: «Дарё»

Савдо маркази яқинида яшовчи Суҳроб Ҳожиқулов ҳам қаттиқ гумбурлаган овоздан уйғониб кетган, уйғонган вақти устига ойна синиқлари тўкилган бўлган. «Амаллаб туриб, чиқишга уриндим. Бошимдан жароҳат олган эканман», — дейди у (айнан шу лаҳзада расмий ахборотдаги «тўққиз киши тан жароҳат олди» деган гап унчалик ҳам ишонарли эмаслиги ойдинлашади). Даҳшатли воқеа бўлганини таъкидларкан, Суҳроб Ҳожиқулов уйи «Юбилейний»даги портлашдан кейин яроқсиз аҳволга келиб қолганини айтади.

Фото: «Дарё»

Фото: «Дарё»

Фото: «Дарё»

Эркин Ғаниев ҳам «Юбилейний»га қўшни маҳалладан. Гумбурлаган овозни эшитган вақти «уйимда газ портлади» деб ўйлаб, ваҳимага тушиб қолган. «Шу даражада кучли гумбурлаш эшитилдики, газ трубамизга нимадир тегди. Газимиз портлади, деб ўйладим. Кўчага чиқсам, ҳаммаёқда бақир-чақир. Кейин қўшнилар чиқди. Портлашдан сўнг болаларни олиб, қизимникига кетдим», — дейди Эркин Ғаниев.

Фото: «Дарё»

Фото: «Дарё»

Фото: «Дарё»

Фото: «Дарё»

Портлаш содир бўлган ҳудуддан тахминан 3-4 километр масофадаги маҳаллада яшовчи тадбиркор Дилрабо Абдураҳмонованинг айтишича, даҳшатли гумбурлаш овози ва портлаш тўлқини уларнинг уйида ҳам сезилган.

«Жуда даҳшатли портлаш бўлди. Уйимизда кучли силкиниш кузатилди. Кўчага чиқсак, ёнғин бўлаётган экан. Кейин бизга телефон қилиб, дўконимизга зарар етганини атйишди. Шошиб, етиб келдик. Келсак, ҳамон ёнғин ва тутун бўлаётган экан. Дўконларимизга зарар етган. Дераза ва эшигимиз ойналари синиб, эшиклар қийшайган. Анча зарар кўрдик», — дейди Дилрабо Абдураҳмонова.

Фото: «Дарё»

Фото: «Дарё»

Фото: «Дарё»

Воқеа содир бўлган маҳаллада яшовчи 71 ёшли Жума бобо Норовнинг айтишича, портлаш уюштирилган бўлиши ҳам мумкин. «Портлашни кимдир уюштирган, деган тахминим бор. Газдан ёки ‘светъдан бўлса, бунчалик зилзила бўлмасди. Ўтган йили ‘Ҳабиб бозор’ ёнганди, ўзи билан ўзи бўлганди. Атрофга зарар бергани йўқ эди. Бу эса 5-10 километр узоқликдаги маҳаллаларга ҳам эшитилди. Атрофдаги барча дўкон, чойхона ва биноларни яроқсиз ҳолга келтирди», — дейди отахон.

Фото: «Дарё»

Фото: «Дарё»

Фото: «Дарё»

«Дарё» мухбирининг қўшимча қилишича, портлаш оқибатида 10 га яқин савдо дўконларининг эшик ва деразаларига, иккита чойхонанинг том қисми ва олд томонига, шунингдек, савдо маркази олдидаги ресторан ва кийим дўконига, Денов тумани ҳокимлиги биносига, Туман солиқ инспекциясининг ҳали фойдаланишга топширилмаган янги биносига, маҳалладаги 6 та аҳоли хонадонига, кўп қаватли уйлар ва бир фуқаронинг автомобилига зарар етган.

Фото: «Дарё»

Фото: «Дарё»

Фото: «Дарё»

ФВВ ахборотига кўра, ҳодиса жойига Ўзбекистон бош вазири биринчи ўринбосари Очилбой Раматов бошчилигидаги ҳукумат комиссияси сафарбар этилган. «Ҳозирда мазкур ҳолат юзасидан дастлабки терговолди суриштирув ишлари олиб борилмоқда», — дейилади вазирлик ахборотида. Дастлабки маълумотларга кўра, портлаш савдо мажмуасида газ асбоб-ускуналаридан фойдаланиш қоидаларининг бузилиши оқибатида тўпланган газ-ҳаво аралашмасининг чақнаши оқибатида келиб чиққан.

Муаллиф:Отабек Қўлдошев