Фарғона вилоятида 2021 йилнинг январь—сентябрь ойларида жиноят содир этиб, судланган ёшларнинг 84,4 фоизи ишсизлар экани маълум бўлди. Бу ҳақда ЎзА хабар қилди.
Хабар қилинишича, 2021 йил 9 ойида 3118 нафар ёшларга нисбатан 2618 та жиноят иши судлар томонидан мазмунан кўриб ҳал этилган. Шундан 304 нафарини вояга етмаганлар ташкил этган.
Қайд этилишича, уларнинг 16 нафари қасддан баданга оғир шикаст етказиш, 19 нафари қасддан баданга ўртача оғир шикаст етказиш, 14 нафари енгил тан жароҳати етказиш, 32 нафари талончилик, 23 нафари фирибгарлик, 177 нафари ўғирлик, 10 нафари транспорт воситалари ҳаракати ёки улардан фойдаланиш хавфсизлиги қоидаларини бузиш, 13 нафари безорилик жиноятларини содир этган.
Жиноят содир этган ёшларнинг машғулоти таҳлил қилинганда уларнинг 2632 нафари ёки 84,4 фоизини ишсиз ёшлар ташкил этиши аниқланган.
Маълумот учун, Фарғона вилоятида 18 ёшдан 30 ёшгача бўлган 703 минг нафар ёшларнинг 81 минг нафари ишсиз бўлиб, 35 минг нафари хорижга чиқиб кетган. Ҳисобга олинмаган ишсиз йигит-қизлар сони 100 мингдан зиёд.
Эслатиб ўтамиз, Ўзбекистонда 2020 йилда 9 минг нафардан ортиқ ишсиз жиноят содир этгани хабар қилинганди. Шунингдек, Шавкат Мирзиёев 2021 йилнинг 1 май ва 1 июнидан бошлаб тадбиркорлар ва ишсиз ёшларга бир қатор имтиёзлар берилишини маълум қилган.
