«Жигули» пиёданинг умрига зомин бўлди, «Зил» ва «КамАЗ» тўқнашди. Сўнгги кунларда содир бўлган ЙТҲлар тафсилоти

Сўнгги кунларда Ўзбекистон йўлларида содир бўлган ҳодисалар ҳақида маълумот тақдим этамиз.

Самарқандда «Жигули» пиёданинг умрига зомин бўлди

Самарқанд шаҳрида «Жигули» пиёдани уриб кетди, дея хабар бермоқда ИИВ ахборот хизмати.

Қайд этилишича, 2021 йил 12 ноябрь куни эрталаб «Жигули» автомашинаси катта тезликда ҳаракатланиб келиб, бошқарувни йўқотган ва йўл четидаги пиёдани уриб кетган. Шундан кейин транспорт воситаси бетон устунга бориб урилган.

Оқибатда пиёда тан жароҳати олиб, шифохонада вафот этган. Ҳайдовчи ҳам тан жароҳатлари билан шифохонага ётқизилган.

Пайариқда «Зил» ва «КамАЗ» тўқнашди

2021 йилнинг 14 ноябрь куни соат 16:00 ларда Самарқанд вилояти, Пайариқ тумани, «Полвон ариқ» МФЙ ҳудудида ўтказилган улоқ-кўпкари ўйини давомида беллашув бўлиб ўтаётган жой атрофидаги баландликда турган «КамАЗ» русумли юк автомобили ҳайдовчиси эътиборсизлик қилиб, қўл тормозини тортмаганлиги натижасида автомобиль пастликка ҳаракатланиб кетган ва «Зил» русумли яна бир юк автомобили билан тўқнашган.

Ҳодиса натижасида тан жароҳати олган фуқаролар йўқ.

Мазкур ҳолат юзасидан Пайариқ тумани ИИБ ЙҲХБ ходимлари томонидан суриштирув ишлари олиб борилмоқда.

Самарқандда дрифт қилган ҳайдовчи жазоланди

Ижтимоий тармоқда Nexia русумли автомобиль ҳайдовчиси ўзи ва ўзгаларнинг ҳаётини хавф остига қўйиб, дрифт қилгани тасвирланган видео тарқалди ва кенг жамоатчилик эътирозларига сабаб бўлди.

Мазкур видео Самарқанд вилояти ИИБ ЙҲХБ ходимлари томонидан ўрганилиб, ушбу ҳайдовчи аниқланди ва унга нисбатан тегишли тартибда маъмурий баённома расмийлаштирилди.