Шошилинч вазиятларда айни муддао бўлган қуруқ шампунлардан фойдаланишда нималарга эътибор бериш кераклиги ҳақида маълумот бериб ўтамиз.
Тозадек кўрсатади
Пудра ёки спрей кўринишида бўлишдан қатъи назар, қуруқ шампунь энг аввало соч юзасидаги ёғ ва кирларга чора кўриб, янги ва тозалик ҳиссини туйишга сабаб бўлади. Шампундаги асосий компонент сорбент кирланишни йўқотишга жавоб беради. Аммо соч бир ҳафта олдин ювилган бўлса, оддий қуруқ шампунь ҳам унга ёрдам бера олмаслиги мумкин. Қуруқ шампунь оддий суюқ шампунчалик тоза қилмагани билан, унинг ўрнини босиши мумкин. Аммо шу билан бирга устини янгидек кўрсатгани ҳисобига, ундан фойдаланиш шошилинч вазиятларда самарали иш беради.
Стайлинг
Қуруқ шампундан фойдалангандан кейин соч аввалгидан қалин ва ҳажмлироқ кўринади. Қолаверса, воситадан кейин сочлар «айтганни қиладиган» бўлиб қолади, яъни тартибга келтириш, мукаммал йиғиш осон бўлади. Ушбу усул айниқса, сочи «начёс» қилингандек кўринишини истайдиганлар учун айни муддао. Соч илдизига сепгандан кейин 2-3 ҳаракатнинг ўзи кифоя қилади. Фойдалангандан кейин сочлар шишиб, ҳажмли кўринади.
Фойдаланиш қоидалари
Фойдаланишдан аввал қуруқ шампунли идишни яхшилаб силкитиш кейин эса бошдан 15 см узоқликда соч илдизига сепиш керак. Кейин массаж ҳаракатлари билан яхшилаб тарқатишга ҳаракат қилиш керак. 5-7 дақиқадан кейин эса тароқ ёрдамида шишириб исталган услубда турмакласа бўлади.
Нимага эътибор бериш керак?
Шампунни фақат қуруқ сочга сепиш ва кун давомида ундан такрор фойдаланмаслик керак. Қайта фойдаланиш ўрнига бошни шунчаки пастга эгиб, қўллар билан тартибга келтиринг.
Ёдда тутиш керак
Қуруқ шампунь соч ва бош терисини қуритиб юборади, деган тушунчалар бор. Аввал чиндан ҳам шундай бўлган бўлиши мумкин, аммо замонавий формула асосида ишланган воситалар бунда таъсир кўрсатмайди. Қуруқ, шикастланган соч эгаларига сочни жилокор кўрсатиш учун турли воситалар, хусусан, қуруқ шампундан фойдаланиш ўрнига парвариш қилиш, озиқлантирувчи ниқоблар қилиш тавсия қилинади.
Изоҳ (0)