Қашқадарё вилояти Яккабоғ тумани ҳокими Лутфиддин Абдуллаевнинг хизмат автомобили йўл-транспорт ҳодисасига учради. Бу ҳақда «Дарё» манбаси хабар берди.
Фото: Камил Фахрутдинов
Қайд этилишича, йўл-транспорт ҳодисаси 2021 йилнинг 7 ноябрь куни кечки вақтда содир бўлган.
«ЙТҲ туман марказидаги ‘Ал-Камол’ савдо маркази рўпарасида содир бўлган. Машинада ҳоким бўлмаган. Ҳайдовчи тез ҳаракатланиб келган ва бошқарувни йўқотган. Машина дарахтга ‘осилиб қолган’», — дейди воқеа гувоҳи.
Фото: Камил Фахрутдинов
«Дарё» мухбири мазкур воқеага аниқлик киритиш мақсадида туман ҳокимлиги ахборот хизмати раҳбари Шерзод Ҳасанов билан боғланди. «Мазкур воқеадан хабарим йўқ. Тез орада суриштириб батафсил маълумот бераман», — деган ҳокимнинг матбуот котиби Шерзод Ҳасанов.
Эслатиб ўтамиз, аварияга учраган 311 миллион сўмлик Captiva харид қилинишидан аввал кўплаб можароларга сабаб бўлганди. Халқ депутатлари туман Кенгаши сессиясида кўриб чиқилган мазкур харид масаласи 25 нафар депутатнинг 24 нафари томонидан қўллаб-қувватланган бўлса, бир нафар депутат мазкур машинанинг сотиб олинишига қарши чиқиб, 311 миллион сўм пулни муҳтожларга сарф қилиш такфлини берганди.
Маълумот учун, Яккабоғ ҳокими хизмат автомобилининг ЙТҲга учраши Қашқадарёдаги ҳокимлар хизмат автомобилининг аварияга учраши билан боғлиқ ягона ҳолат эмас. Косон тумани ҳокими Асрол Бойқараевнинг хизмат автомобили ҳам 2020 йилнинг 12 декабрь куни ЙТҲга учраб, 60 ёшли фуқаронинг ўлимига сабаб бўлганди.
