Халқаро дзюдо федерацияси спортчиларнинг янгиланган рейтингини эълон қилди.
Ўзбекистонлик дзюдочи Давлат Бобонов ўзи иштирок этадиган -90 кг вазн тоифасида етакчига айланди. Эркак дзюдочилар умумий рейтингида эса иккинчи ўринни эгаллаб турибди.
2021 йилда Бобонов Жаҳон чемпионатида кумуш, Осиё-Океания чемпионатида олтин, Токио—2020 Олимпия ўйинларида бронза медалини қўлга киритди. Ушбу натижалар унинг рейтингда етакчи бўлишини таъминлади.
Шу тариқа 9 йил деганда илк бор ўзбекистонлик дзюдочи ўз тоифасида рейтинг пешқадамлигини қўлга олди. Охирги марта Ришод Собиров Лондон—2012 Олимпиадасидан аввал -60 кг вазн тоифасида биринчи ўринда қайд этилган эди.
Шунингдек, яна икки нафар ўзбекистонлик дзюдочи янгиланган рейтингда ўз тоифасида топ-10 дан жой олган. Шарофиддин Болтабоев (-81 кг) аввалги ўрнига нисбатан бир поғона пастлаб, 4-ўринни эгаллаб турибди. Сардор Нуриллаев (-66 кг) ҳам бир поғона пастлаган ва 6-ўриндан жой олган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)