Сурхондарё вилояти Музработ туманида 24 ёшли аёл икки нафар фарзанди билан ўзини каналга ташлашга уринган вақтида ИИБ ходими томонидан тўхтатиб қолинди. Бу ҳақда MY5 телеканалининг «Марказий студия» кўрсатувида маълум қилинди.

Маълум қилинишича, 20 октябрь куни соат 09:30 ларда Музработ туманида истиқомат қилувчи Д. исмли аёл оилавий келишмовчиликлар сабаб ўз жонига қасд қилишга уринган. У ўзи, 4 ёшли ўғли ҳамда 2 ёшли қизининг жонига қасд қилиш мақсадида туман ҳудудидан оқиб ўтувчи Занг канали устига келган.

Ушбу ҳудудда хизмат олиб бораётган ИИБ ходими инспектор Б.А. аёлнинг хатти-ҳаракатларидан у ўз жонига қасд қилмоқчи эканини пайқаб, уни ушлаб қолган ва блокпостга олиб келган.

«Аёлга бу нотўғри ишлигини тушунтирдим. У эса яқинлашсам, ўзини сувга ташламоқчи эканини айтди», — дейди инспектор.

Аёл билан тушунтириш ишлари олиб борилиб, у Музработ тумани ИИБга етказилган.

Аввалроқ Бухорода ўзи ва икки ёшли ўғлини сувга ташлаб, жонига қасд қилишга уринган аёл тўхтатиб қолингани, Тошкентда йигити ташлаб кетган қиз ўзини 8-қаватдан ташламоқчи бўлгани, Фарғонада оилавий жанжал туфайли ўзини поезд остига ташламоқчи бўлган аёл қутқариб қолингани тўғрисида хабар берилганди.

Эслатиб ўтамиз, октябрь бошларида Вазирлар Маҳкамасининг «Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида»ги қарорни қабул қилганди. Ушбу қарор билан Халқ таълими вазирлигига ўз жонига қасд қилишга мойил қизлар рўйхатини шакллантириш вазифаси юкланган эди.