Ўзбекистон президенти сайловларининг назорат қилиниши ва ўтказилиш тартиби умуман олганда демократик сайловлар соҳасидаги халқаро стандартлар, МДҲ конвенцияси ва МДҲ Парламентлараро ассамблеясининг тавсияларига жавоб беради. Бу ҳақда Тошкентдаги брифингда Россия Федерал Мажлисининг Федерация Кенгаши халқаро ишлар бўйича қўмитаси раисининг ўринбосари Фарит Мухаметшин МДҲ ПА миссияси номидан қилган чиқишида маълум қилди, деб ёзмоқда «Gazeta.uz».
Унинг сўзларига кўра, Ўзбекистоннинг миллий қонунчилиги президент сайловини овоз беришга тенг умумий ҳуқуқ асосида, мустақил сайлов органлари тизимига таянган ҳолда ташкил этиш ва ўтказишни қўллаб-қувватлайдиган асосий норматив асосларни ўз ичига олади.
«Таассуротларимнинг энг асосийси — бу яхши кайфият. Тушлик пайтига келиб сайлов участкаларида 50 фоизгача сайловчилар овоз берди. Кўплаб сайловчилар мамлакатда оддий халқ интилишларига жавоб берадиган туб ўзгаришлар, ислоҳотлар амалга оширилаётганини таъкидламоқда. Президентликка номзодлар умуман олганда ўзбек халқининг кутилмаларига мос дастурларни илгари сурди — бу ижтимоий масалалар, иқтисодий ривожланиш билан боғлиқ кўплаб муаммолардир», — деган Фарит Мухаметшин.
Ўзбекистондаги президент сайловларини МДҲ ПА томонидан 50 дан ортиқ киши кузатмоқда. Уларнинг ярми Ўзбекистонда бўлса, қолганлар бошқа мамлакатларда очилган сайлов участкаларида жараённи кузатмоқда.
«Бизнинг миссиямиз бугун бутун мамлакат бўйлаб ўтмоқда — Самарқандда, Бухорода ва бошқа ҳудудларда ва биз кечки пайт билдирилган ёки гувоҳи бўлган барча изоҳларимиз ва тилакларимизни билдирамиз», — дея қўшимча қилган Фарит Мухаметшин.
Унинг сўзларига кўра, МДҲ ПАнинг бирламчи узоқ муддатли миссияси Ўзбекистонга эксперт-мутахассислар сифатида сайловдан анча олдин етиб келган. Улар сайловни ўтказиш бўйича қонунчиликнинг халқаро стандартларга мослигини ўрганиш учун Марказий сайлов комиссияси, республика ва маҳаллий ҳокимият органлари билан учрашувлар ўтказган.
Ўзбекистон президенти сайловида овоз бериш жараёни 24 октябрь куни соат 20:00 га қадар давом этади. Сайловни 971 нафар халқаро кузатувчи, жумладан, халқаро ташкилотлардан 631 нафар ва хорижий давлатлардан 340 нафар кузатувчи кузатмоқда. Шунингдек, партиялардан 53 700 нафар, фуқароларнинг ўзини ўзи бошқариш органларидан 10 700 нафар кузатувчи рўйхатга олинган. Сайлов жараёнини маҳаллий ва хорижий ОАВларнинг 1670 вакили ёритмоқда.
Марказий сайлов комиссияси раиси Зайниддин Низомхўжаев сайлов қонунчилиги бузилиши ҳолатлари аниқлангудек бўлса, суд, прокуратура органлари ёки маҳаллий сайлов комиссияларига мурожаат қилиш мумкинлигини маълум қилганди. Барча сайлов участкаларида қонунбузилиш ҳолатлари юзасидан мурожаатлар учун телефонлар мавжуд.
Изоҳ (0)