Қашқадарё вилоятида 2021 йилнинг ўтган тўққиз ойи мобайнида содир бўлган 369 та йўл-транспорт ҳодисалари оқибатида 181 нафар киши вафот этгани, уларнинг 31 нафари вояга етмаган болалар экани маълум қилинди. Бу ҳақда Қарши шаҳар Йўл ҳаракати хавфсизлиги бўлими ахборот хизмати инспектори Аҳрор Усмоновга таяниб, «Дарё» мухбири хабар берди.

Аҳрор Усмоновнинг аниқлаштиришича, Қарши шаҳрида бу кўрсаткич 47 тани ташкил қилиб, 2020 йилнинг ўтган даврига нисбатан тўрттага кўпайган.

«Қарши шаҳрида 2020 йилнинг ўтган тўққиз ойи мобайнида 43 та йўл-транспорт ҳодисаси содир этилиб, вафот этганлар саккиз нафар кишини ташкил қилган бўлса, жароҳатланганлар 35 киши эди. 2021 йилнинг ўтган даврида эса ЙТҲлар 47 тага ошиб, вафот этганлар 10 нафар кишини, жароҳатланганлар эса 41 нафар кишини ташкил қилган. Энг ёмони содир бўлган йўл-транспорт ҳодисаларининг олтитаси болалар билан боғлиқ бўлиб, бир нафар ёш бола, ҳали бир ёшга ҳам етмаган чақалоқ вафот этди», — дейди Аҳрор Усмонов.

Аҳрор Усмонов.

Фото: «Дарё»

Маълум қилинишича, 2021 йилнинг ўтган даври мобайнида вилоятда энг кўп йўл-транспорт ҳодисалари Чироқчи туманида содир бўлган бўлиб, бу кўрсаткич туманда 71 тани ташкил қилган. Шунингдек, Ғузорда 33 та, Деҳқонободда 16 та, Шаҳрисабз ва Китоб туманларида 13 тадан, Шаҳрисабз шаҳрида 23 та, Яккабоғда 25 та, Қамашида 31 та, Касбида 9 та, Миришкорда 4 та, Муборак ва Нишон туманларида 11 тадан, Косон туманида 20 та, Қарши туманида эса 42 та йўл-транспорт ҳодисаси содир этилган.

«Мазкур йўл-транспорт воқеалари сабаб вафот этган 181 нафар кишининг 31 нафари ёш бола бўлган. Шунингдек, йўл-транспорт ҳодисаларида 45 нафар бола ҳам тан жароҳати олиб, шифохонага ётқизилган», — дейди «Дарё» мухбири билан суҳбатлашган масъуллар.

Вилоят ҳудудида содир бўлган ЙТҲларнинг 114 таси тўқнашув, 145 таси пиёдани уриб юбориш, 31 таси велосипед ҳайдовчисини уриб юбориш, 26 таси тўсиққа урилиш, 44 таси ағдарилиш, 5 таси тўхтаб турган транспорт воситасига урилиш, 1 таси ҳайвонни, 2 тасида от аравани уриб юбориш билан боғлиқ экани маълум бўлган.

«Вилоят ҳудудида содир бўлган ЙТҲларнинг 37 таси пиёдаларнинг айби билан, яъни пиёда йўлнинг белгиланмаган қисмида кесиб ўтаётган пайтда содир бўлган. Шу боис биз ҳар доим нафақат ҳайдовчилар, пиёдаларнинг ҳам йўл ҳаракати қоидаларига риоя қилишини назорат қилиб, керак бўлса, уларнинг қоидабузарлиги учун жарима ҳам қўллаймиз», — дейди Аҳрор Усмонов.

«Дарё» мухбири билан суҳбатлашган йўловчилардан бири Маъмура Эргашеванинг айтишича, йўл-транспорти ҳодисалари йўловчиларнинг йўлнинг белгиланмаган қисмини кесиб ўтиши, шунингдек, ҳайдовчиларнинг тезликни белгиланган меъёрдан ошириши оқибатида келиб чиқмоқда.

«Тан олиш керак, аксарият ҳолларда пиёдаларнинг йўлнинг белгиланмаган қисмидан кесиб ўтиши, шунингдек, ҳайдовчиларнинг тезликни ошириши йўл-транспорт ҳодисаларининг келиб чиқишига сабаб бўлмоқда. Қолаверса, бугун йўлларда йўл ҳаракати қоидаларини яхши билмайдиган, ўқимасдан ҳужжат олган ҳайдовчилар ҳам жуда кўп. Бу эса аянчли воқеаларга сабаб бўлмоқда», — дейди Маъмура Эргашева.