Ташқи меҳнат миграцияси агентлиги жорий ҳафта давомида Россия ва Украинада мураккаб молиявий аҳволда қолган ва меҳнат қобилиятини йўқотган 6 нафар фуқарони консуллик идоралари кўмагида Ўзбекистонга қайтарди. Бу ҳақда агентлик матбуот хизмати хабар берди.
Улардан бири самарқандлик А.Қ. бўлиб, 2020 йил март ойида Россиянинг Томск шаҳрига ишлаш мақсадида бориб, саломатлиги ёмонлашгани сабабли меҳнат қобилиятини йўқотган. Ушбу фуқаро агентлик ташаббуси ва ҳомийлар кўмагида даволаниш билан боғлиқ харажати, озиқ-овқат ва вақтинчалик яшаш жойи билан таъминланган. Шунингдек, Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан 22 сентябрь куни Новосибирск—Тошкент йўналишида ватанга қайтарилган.
Навбатдаги фуқаро 59 ёшли фарғоналик У.Ю. 2021 йилнинг август ойида ишлаш мақсадида Россияга бориб, соғлиги ёмонлашган ва меҳнат қобилиятини йўқотган. Агентлик томонидан ҳомийлар жалб қилиниб, 24 сентябрь куни Санкт—Петербург—Фарғона йўналишида Ўзбекистонга қайтиб келган.
Асли Наманган вилоятидан бўлган А.И. шу йили Новосибирск шаҳридаги қурилиш объектида ишлаш мақсадида бориб, касалликка учраб, ишсиз қолган. Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан агентлик кўмагида Новосибирск—Тошкент йўналишидаги авиарейс билан ватанга қайтарилган.
Андижонлик Ж.Т. ҳам 2019 йилда қурилиш соҳасида ишлаш мақсадида Новосибирск шаҳрига бориб, муқим иш жойларида ишлолмагани сабабли молиявий қийин аҳволда қолган. Фуқарога агентлик кўмагида ҳомийлар жалб қилинган ҳолда Новосибирск—Андижон йўналишидаги авиарейс билан Ўзбекистонга қайтиш учун авиа чипта ташкил қилинган.
Новосибирскда соғлиги ёмонлашиши натижасида молиявий қийин аҳволда қолган яна бир фуқаро навоийлик 51 ёшли И.П.га агентлик ташаббуси билан сахий инсонлар кўмагида ватанга қайтишига амалий ёрдам кўрсатилган.
Қашқадарёлик М.М. 2021 йилда ижтимоий тармоқдаги эълон асосида Украинанинг Киев шаҳрига бориб, таклиф этилган компания билан келишолмай молиявий қийин аҳволда қолади. Ўзбекистоннинг Укранидаги Бош консулхонаси билан ҳамкорликда 22 сентябрь куни Киев—Тошкент йўналишидаги авиарейс орқали Ўзбекистонга қайтишига кўмаклашилган.
Аввалроқ Россиядаги корхона ичкиликка берилган 47 нафар ўзбекистонлик мигрант билан меҳнат шартномасини бекор қилиб, ватанга қайтариб юборгани ҳақида хабар берилган эди.
Изоҳ (0)