Андижон вилояти ИИБ ижтимоий тармоқларда тарқалган мактаб ўқувчиси уч нафар тенгдошига пичоқ билан жароҳат етказгани тўғрисидаги хабар юзасидан расмий маълумот берди.
Ижтимоий тармоқларда Андижон шаҳридаги 2-сонли мактабнинг юқори синф ўқувчилари ўртасида жанжал содир бўлгани тўғрисида хабарлар тарқалди. Мазкур ҳолат бўйича Андижон шаҳар ИИО ФМБ томонидан ўрганиш ишлари олиб борилган.
Аниқланишича, шу куни Республика шошилинч тиббий ёрдам илмий маркази Андижон филиалидан ИИО ФМБга уч нафар фуқарога ўткир тиғли предметлардан олинган жароҳатлар билан мурожаат қилгани тўғрисида хабар келиб тушган.
Маълумотларга кўра, 22 сентябрь куни соат 13:20 да М. исмли йигит шаҳардаги 2-сонли мактаб олдида 3 нафар таниши билан кўришган, шундан сўнг гаплашиб олиш мақсадида кафе ёнига борган.
У ерда ўзаро келишмовчилик сабабли йигитлар ўртасида жанжал юзага келган. Жанжал вақтида М. ёнидаги йиғма пичоқ билан уч нафар тенгдошига тан жароҳати етказган.«Икки ошнам билан ҳазиллашаётганимда қолганлари келиб, сен бизни ҳам гапиряпсан, деб уришиб кетди», — дейди йигит.
Мазкур ҳолат юзасидан Жиноят кодексининг 277-моддаси (безорилик) 3-қисми «г» банди билан жиноят иши қўзғатилиб, тергов ҳаракатлари олиб борилмоқда.
Аввалроқ Навоийда спиртли ичимлик таъсирида танишини пичоқлаб ўлдирган машина устаси 10 йилга қамалгани, самарқандлик йигит севган қизи, унинг синглиси, опаси ва онасини пичоқлагани, Тошкентда 14 ёшли бола у билан саломлашмаган 22 ёшли йигитга пичоқ билан тан жароҳати етказгани тўғрисида хабар берилганди.
Изоҳ (0)